Tơdrong vă jang tơ iung pơjing trong hnam, pơlei hle tơ̆ tơring Dă Huoai, dêh char Lâm Đồng ‘noh mĭnh lơ̆m dôm tơdrong jang kăl hloh tơgŭm ăn pơjing hơnih oei ‘nao kơ tơdrong jang trong gre rĕnh Tân Phú – Bảo Lộc. Tơdrong vă jang đei kon jên tơmơ̆t jang hloh 150 ti hlak jên. Atŭm đei ƀơm ưh kơ ‘lơ̆ng đơ̆ng ‘mi jrăh, tơdrong iung jang ming man hiơ hiơ̆ kơ yuơ tơƀơ̆p tơnap tap lơ̆m bơ̆ jang iŏk tơvih teh. Ƀok Lê Bảo Thi, Vei lăng tơdrong vă jang ming man trong hnam pơlei oei ou tơbăt, hơnih tơmơ̆t jên jang hlôi hơmet ăn tôm kmăi kmŏk, bơngai jang, tơlĕch iung jang hloi lăp hơmet pơ ‘lơ̆ng dôm tơdrong tơhlăk tơhlĭn.“Dang ei kŏng nhân iung jang rim hơnih jang tŏ sĕt hloh 60 ‘nu. Lăp gô chang tŏ ƀiơ̆ ‘noh iung jang hloi. Truh năr 31/12 ‘noh gô pơm keh đang pơjao ăn rim ŭnh hnam kon pơlei mơ̆t oei”.

Sơnăm 2025, akŏp kon jên teh đak tơmơ̆t jang kơ dêh char Lâm Đồngt ‘noh 18.700 ti hlak jên. Lơ̆m 7 khei, lơ̆m dêh char tơlĕch kon jên dang 30% trong tơlĕch ăn. Tơdrong tơm pơm ăn tơlĕch kon jên jang teh đak tơmơ̆t jang hiơ hiơ̆ găh lơ tơhlăk tơhlĭn lơ̆m iŏk tơvih teh. Dang ei, lơ tơdrong vă jang hlôi pơm keh đang hla bơar, mă lei teh tim mă đei kơna ưh kơ gơh vă tơlĕch jang.

Ƀok Hồ Văn Mười, Kơdră chĕp pơgơ̆r Hơnih vei lăng kon pơlei dêh char Lâm Đồng akhan, vă keh đang trong tơlĕch jang kon jên jang teh đak tơmơ̆t jang lơ̆m sơnăm 2025 iŏk đei 95%, dêh char kăl iung jang đĭ ai hloh dơ̆ng. Lơ̆m ou, bơ̆ jang iŏk tơvih teh ‘noh mĭnh lơ̆m tơdrong jang kăl hloh, kăl pơ đĭ lơ̆m khul jang chinh trĭ vang iung jang hloi.“Tơdrong joăt jang kơ kang ƀô̆ bơ̆ jang xek tơlang iŏk tơvih teh ‘noh kăl hloh. Bơngai ayơ năm bơ̆ jang mă pơma mĭnh mĭnh ƀar ƀar ‘noh ưh kơ kĕ ôh. Kơ yuơ lơ loh kăl chă rơih bơngai, ăn dôm bơngai lơ liơ, iung bơ̆ jang chă pơrô̆ pơrôp ‘noh bu. Mưh iung jang bơ̆ jang pơrô̆ pơrôp iŏk tơvih teh ‘noh kăl pơ đĭ lơ̆m khul chinh trĭ vang iung jang hloi”.