Đơ̆ng rŏng hơgrop Lâm Đồng, Bình Thuận păng Dak Nông, dêh char Lâm Đồng hle đei hơgăt teh să hloh 24.000km² - să mhloh lơ̆m teh đak, hăm vă jê̆ 4 triu ‘nu kon pơlei. Lơ̆m dêh char đei hloh 2 triu 700.000 ‘nu bơngai tăh hla. Dêh char Lâm Đồng đei 6 hơnih tăh hla kơdră tang măt Kuô̆k hô̆i ( pôk rơih 17 ‘nu kơdră tang măt) păng 38 hơnih pôk rơih kơdră tang măt Jơnŭm vei lăng kon pơlei dêh char (pôk rơih đei 85 ‘nu bơngai tang măt). Tơ̆ tơring đei 1.004 hơnih tăh hla, 2.301 hơnih tăh hla vă pôk rơih 2.949 ‘nu kơdră tang măt. Truh dang ei dêh char hlôi jang keh đang tơdrong pơm hla bơar, pơklep hla bơar hơnăn bơngai tăh hla, hơnăn bơngai pơjei păng hơmet ăn tôm tong tơdrong pơgơ̆r pôk rơih. Jơnŭm chep pơgơ̆r Pôk rơih teh đak jei hlôi lăp đon ăn asong dêh char Lâm Đồng pơgơ̆r tăh hla hrôih tơ̆ 5 tơring lơ̆m năr 14/3, găh khul Ƀô̆ đô̆i vei lăng sơlam teh đak tơ̆ rim tơring Hàm Tân, Thuận Hạnh, Thuận An (2 Tơring) tơring Dak Wil.