VOV4.Bahnar - Jăl trong gre rĕnh Dầu Giây-Liên Khương atăih dang 200km, đei klăh asong pơm 3 tơnô̆ jang ‘nŏh: Dầu Giây - Tân Phú, Tân Phú - Bảo Lộc păng Bảo Lộc - Liên Khương. Lơ̆m au, 2 tơdrong vă jang: Tân Phú- Bảo Lộc păng Bảo Lộc - Liên Khương, đei trong hơtăih vă jê̆ 140km kơ yuơ Dơnŏ anĭh vei lăng kon pơlei dêh char Lâm Đồng -dơnŏ anĭh bơ̆ jang tĕh đak iŏk jang.

Kon pơlei dêh char Lâm Đồng lăng rup vă pơm trong gre rĕnh

Kiơ̆ đơ̆ng Dơnŏ anih vei lăng kon pơlei dêh char Lâm Đồng, dêh char gô hơmet ăn 4.500 ti hlak jên lơ̆m akŏp kon jên jang 16.200 ti hlak jên ăn ming man 66km trong gre rĕnh Tân Phú - Bảo Lộc; tơlĕch ăn 10.800 ti hlak jên lơ̆m akŏp kon jên tơmơ̆t jang 12.000 ti hlak jên ăn ming man 73km kơ tơdrong ming man trong gre rĕnh Bảo Lộc-Liên Khương. ‘Nau kon jên dêh char tơlĕch jang lơ hlŏh kơ Lâm Đồng đơ̆ng sơ̆ trŭh dang ei ‘măn ăn mĭnh tơdrong jang ming man trong nơnăm. Ƀok Trần Văn Hiệp, Kơdră chĕp pơgơ̆r Dơnŏ anĭh vei lăng kon pơlei dêh char Lâm Đồng tơbăt, trong gre rĕnh Dầu Giây-Liên Khương ‘noh jing tơdrong hơpơi ‘mĕh vă tĭh tên hlŏh kơ kang ƀô̆ păng kon pơlei dêh char Lâm Đồng. Kơ yuơ lơ lŏh, dêh char hlôi kơrŭn đĭ jơhngơ̆m hơmet ăn, sơđơ̆ng rim trong vă jang vă tơlĕch iung jang ming man hloi mư̆h dang yơ đei Thủ tướng tĕh đak kĭ tơchơ̆t ăn tơmơ̆t jên jang ming man.

Tơblơ̆ nơ̆r: Amazưt