Hrei ou dêh char Lâm Đồng đei hloh 33.000 hơnih mơdro sa hăm akŏp kon jên tơmơ̆t jang hloh 350.000 ti hlak jên. Rim bơngai mơdro sa, hơnih mơdro sa hlôi păng tŏk bŏk tơgop kơtang, tih tên ăn atŏk tơ iung mŭk drăm-tơpôl kơ dêh char. Tơ̆ Hop akom pơtrŭt tơmơ̆t jên jang ou ki, Hơnih vei lăng kon pơlei dêh char Lâm Đồng hlôi pơjao ăn tơdrong tơchơ̆t tơmơ̆t jên jang, hla bơar drơ̆ng nơ̆r apĭnh tơmơ̆t jên jang ăn rim hơnih mơdro sa hăm akŏp kon jên tơmơ̆t jang 9 tơdrong vă jang hloh 35.000 ti hlak jên. Dêh char jei kĭ pơkăp drơ̆ng nơ̆r ƀlŏk hơdơ̆r jang hơdoi hăm 12 hơnih tơmơ̆t jên jang akŏm lơ̆m dôm tơdrong jang kăl. Tơdrong hơvơn dơ̆ng đei lơ bơngai tơmơ̆t jên jang jĭ hơyak blŭng kăl hloh, tơgŭm ăn Lâm Đồng iŏk đei nơ̆r pơkăp truh sơnăm 2030 đei jing dêh char atŏk tơ iung ‘lơ̆ng nhen trong tơlĕch ăn Hop akŏm tih Đảng ƀô̆ dêh char hlôi tơlĕch ăn.