VOV4.Bahnar - Kơ yuơ tơdrong jang pơm hla bơar oei lơ tơdrong, kang ƀô̆ chĕp kơ̆l oei vĕh ver, tơpŭ dĭh băl pơm ăn tơdrong krao hơvơn tơmơ̆t jên jang tơ̆ Lâm Đồng ư̆h kơtang.

Lâm Đồng hơvơn tơmơ̆t jên jang oei đei lơ tơdrong tim ‘lơ̆ng

Đơ̆ng blŭng sơnăm trŭh dang ei, dêh char Lâm Đồng hơvơn đei 9 tơdrong vă jang tơmơ̆t jên jang, hăm hơgăt tĕh hlŏh 77ha păng kon jên tơmơ̆t jang hlŏh 700 ti hlak jên. Atŭm hăm ‘nau, đei 24 tơdrong vă jang apĭnh hơmet ming trong tơmơ̆t jang, 3 tơdrong vă jang anai pơdrĕo iŏk, ư̆h kơ ăn jang. Akŏp tơdrong tơmơ̆t jên jang oei jang kiơ̆ lơ̆m dêh char hrei au ‘nŏh 969 tơdrong vă jang, lơ̆m au hlŏh 600 tơdrong vă jang hlôi jang keh đang. Dơnŏ anĭh vei lăng kon pơlei dêh char Lâm Đồng sơkơ̆t hơdăh, tơdrong tơmơ̆t jang dêh char kơdŭn dơ̆ng ‘nŏh kơ yuơ trong bơ̆ jang tim ‘lơ̆ng, bơngai chĕp kơ̆l rim hơnĭh jang bơ̆ jang ư̆h tơnăp, vĕh ver, tơpŭ dĭh băl pơm kơnê̆ trŭh tơdrong tơmơ̆t jên jang.

Tơblơ̆ nơ̆r: Amazưt