Xơnăm 2022, tơdrong pơkăp jên axong jang kŏng kơ dêh char Lâm Đồng đei axong noh jê̆ 6.500 rơtăl hlj vă pơm jang 350 tơdrong vă jang. Lơ̆m noh, đei 722 rơtăl hlj pơdui đơ̆ng xơnăm 2021 pơkăp jang.

Kiơ̆ kơ ƀok Bùi Sơn Điền, Kơdră Anih Pơkăp păng Axong jang dêh char Lâm Đồng, jô̆ truh năr 15/11, pơkăp jên axong jang kŏng kơ xơnăm 2022 kơ dêh char pơtơm axong đei 3.694 rơtăl hlj, đei jơnei 68,5% pơkăp jang. Kơlih kiơ tơdrong axong jên jang adar kơyuơ ƀơm lơ tơnap tap, tơhlăk tơhlĭn lơ̆m hơmet hrŭ ‘mong jên iŏk teh pơm jang păng dôm hla bar pơkăp hanh chĭn. Dang ei anih jang tŏk bŏk oei hăt hot jang hadoi hăm dôm anih jang kơpal kơ dêh char vă pơtrŭt hơvơn dôm tơ ‘ngla axong jang hơtŏk tenh tơdrong pơm jang. Adrin truh năr 31/12 âu kơnh đei jơnei jên axong jang hloh 95% păng truh đĭ jăl 1/2023 đei jơnei 100% pơkăp jang: “Nhôn duh hlôi bơ̆ jang hăm rim tơ ‘ngla axong jang, hăm dôm tơring  noh ƀơm lơ tơnap tap. Mă lei, kiơ̆ tơroi păng kiơ̆ pơkăp đơ̆ng dôm tơ ‘ngla axong jang noh mă lơ gô axong kiơ̆ pơkăp jang. Kơsô̆ jên oei lăi noh lơ lơ̆m kơplăh khei năr pơm jang  oei pă hloh 1 khei dơ̆ng đĕch, kơyuơ noh nhôn duh hlôi bơ̆ jang, krao điê̆n thoăi vă chă hơlêm tơbăt. Găh minh ƀar tơdrong jang mă tơlĕch jang adar hloh pơkăp noh duh hlôi tơroi hăm Anih vei lăng kon pơlei dêh char”.

Tơrĕk hloh, dôm tơdrong pơkăp jang đei axong jên jang adar adoi oei lơ̆m tơdrong jang kơ dôm anih jang kơ dêh char pơgơ̆r axong jang. Hơdăh nhen Anih Tơroi tơbăt đei axong 22 rơtăl hlj mă lei adrô̆ axong đei 28%, Anih Choh jang xa păng Hơtŏk tơring pơxĕl axong 224 rơtăl hlj pơtơm axong đei 23%, Hnam pơgang tơm dêh char đei axong 12 rơtăl hlj mă lei pơtơm đei axong ăn 11% ‘nâu nai hia.

Hăm tơdrong ưh kơ măh jên axong jang kŏng lơ̆m tơring kơyuơ axong jên jang adar, ƀok Trần Văn Hiệp, Kơdră Anih vei lăng kon pơlei dêh char Lâm Đồng ăn tơbăt gô pơkăp xek hơlen hăm xơnong jang kơ dôm tơ ‘ngla pơgơ̆r jang mưh ưh kơ vei xơđơ̆ng axong jên jang kiơ̆ nhen pơkăp: “Axong jên pơm jang kŏng kơ dêh char oei lơ pơxuơ̆k pơxuơ̆l, adar lơ̆m tơdrong hrŭ ‘mong teh iŏk pơm jang, minh ƀar tơdrong pơm jang tơbŏ dăh hlôi jang keh đang mă lei dang ei duh tam mă jang đang. Lơ̆m noh, tơdrong axong jên jang đơ̆ng minh ƀar anih jang oei tơhlăk lang lap, athei băt hơdăh păng ưh lê̆ đei tơdrong mă âu dơ̆ng ôh. Đon kơchĕng noh xơkơ̆t truh jê̆ đĭ xơnăm, anih jang mă yơ ưh đei axong jên jang noh athei iŏk tơvih jên jang păng ưh đei axong ăn dơ̆ng ôh, drơ̆ng iŏk tơdrong jang kơplăh kơplơt. Păng xơnong jang tơpŭ ăn Kơdră dôm anih jang, rim tơdrong jang”.