Sơnăm 2022, mŭk drăm - tơpôl kơ dêh char Lâm Đồng hơnơ̆ng hơtŏk tơiung pran, iŏk đei lơ jơnei gĭt kăl lơ̆m đĭ đăng dôm tơdrong jang. Pơđĭ 18/18 tơdrong hơgăt tă kơ iŏk đei păng yak hloh hăm trong jang tơlĕch ăn. Lơ̆m noh, hơiă ‘noh jĭ kơsô̆ jang tŏk mŭk drăm đei truh 12,09%, tŏk hơtăih pơtêng hăm trong tơlĕch ăn ‘noh 6 truh 7%; choh jang sa hơtŏk tơiung sơđơ̆ng, kơmăy kơmŏk - pơvih pơvăn tŏk pran, tơmang lăng tơiung ming hrĕnh; jên tĕch tơmam tơ̆ teh đak đe tŏk lơ pơtêng hăm trong tơlĕch jang; thu mong jên jang tơchĕng hơdrol pơđĭ sơnăm iŏk đei 13.100 ti hlak jên.

Tơdrong jang tơjur dơnuh hin kơjăp iŏk đei lơ jơnei ‘lơ̆ng, vei lăng sơđơ̆ng tơdrong arih sa tơpôl, sơđơ̆ng teh đak đei vei kơjăp. Pơma pơgơ̆r ‘măng hop akŏm, ƀok Trần Đức Quận, Bơngai jang lơ̆m Anih chĕp kơ̆l Trung ương đảng, Bí thư Anih jang Đảng dêh char, Kơdră chĕp kơ̆l Jơnŭm pơgơ̆r kon pơlei dêh char Lâm Đồng akhan, mă đơ̆ng mŭk drăm - tơpôl iŏk đei lơ tơdrong hơiă mă lei oei đei lơ tơdrong ưh kơ ‘lơ̆ng lơ̆m tơdrong jang pơgơ̆r, vei lăng kăl kơ đei hơlen lăng, pơma dơnuh, tơƀôh ăn tơdrong tơm pơm ăn păng trong jang hơmet pơ ‘lơ̆ng. Tơ̆ ‘măng hop akŏm âu, dôm bơngai tang măt gô pơgơ̆r ăn tơgop nơ̆r hăm 27 hla ar chih tơroi tơbăt, set hơlen tơchơ̆t pơdrơ̆ng kiơ̆ 28 tơdrong tơchơ̆t gĭt kăl, păng yơ̆r ti pơdrơ̆ng kiơ̆ dôm tơdrong jang đei ƀơm ‘lơ̆ng truh tơdrong hơtŏk tơiung kơ dêh char nhen: tơdrong jang ming man trong gre kơdâu hrĕnh trong Bảo Lộc – Liên Khương kiơ̆ trong jang hơdai teh đak, kơdih; tơdrong jang tang găn hrăt hrot tơ̆ trong nơnăm lơ̆m pơlei tơm Đà Lạt.