VOV4.Bahnar - ‘Năr 7/7, Jơ nŭm pơ gơ̆r kon pơ lei dêh char Lâm Đồng jăl X pơ gơ̆r hop akŏm mă 6 pơ ma nuh păng tơ lĕch lơ trong jang vă hơ met pơ ‘lơ̆ng dôm tơ drong tam mă pran, hơ nơ̆ng tưk tơ iung tơ drong jang mŭk drăm, tơ pôl tơ̆ tơ ring tŏk pran hlŏh dơ̆ng. 6 khei blŭng sơ năm 2022, mŭk drăm, tơ pôl Lâm Đồng iŏk đei lơ tơ drong jơ nei ‘lơ̆ng hơ iă.

Jơ bơ̆ jang lơ̆m Hop akŏm

Lơ̆m nŏh, hơ iă hlŏh jĭ mŭk drăm tŏk truh 9,29%; thu mong jên tĕh đak đei 7.800 ti, tŏk hlŏh 22% pơ têng hăm khei âu sơ năm sơ̆. Akŏm đĭ đăng jên tĕch tơ mam tơ̆ tĕh đak đe hlŏh 436 triu USD, tŏk 43%; păng tơ moi chă tơ mang lăng đei hlŏh 3,7 triu  ‘nu, tŏk 86,5% pơ têng hăm khei âi sơ năm 2021. Dôm tơ drong jang vei sơ đơ̆ng tơ drong arih xa tơ pôl, tơ jur tơ nuh hin, vei sơ đơ̆ng chinh trĭ păng sơ đơ̆ng lơ̆m tơ pôl đei jang ‘lơ̆ng ngăl.

Dôm bơ ngai tang măt ‘măn lơ jơ pơ ma nuh, tơ blang hơ dăh dôm tơ drong oei tơ hlăk

Hơ dai hăm dôm tơ drong jang đei, Lâm Đồng oei tơ jră hăm lơ tơ drong mơ mat tat ‘năi, mă loi jĭ tơ drong vei lăng bri, vei lăng tơ mam bri brăh, tĕh, tơ lĕch trong tơ proh hơ drol… Hop akŏm akhan ‘nâu jĭ dôm tơ drong oei găn trong kăl đei pơ ma nuh, tơ blang hơ dăh, chă trong sek tơ lang pơ ‘lơ̆ng vă tưk tơ iung tơ drong jang mŭk drăm - tơ pôl.

Dơ̆ng: Tơ blơ̆