Rim pơgê 'năr Puăn, Hơnih jang hanh chĭnh kŏng xah Hàm Tân jing hơnih tơƀơ̆p băl đơ̆ng jơnŭm pơgơ̆r tơring păng kon pơlei. Ah kơƀang chih iŏk hô sơ, đei kơchok đak hla che, cheh phe đei hơmet hơdrol vă hơvơn kon pơlei chă huch lơ̆m kơplah oei gô pơm hla bơ-ar dah mă atŭm pơma dơnuh hăm đe kơdră tơring. Đơ̆ng rŏng kơ tơlĕch jang kiơ̆ jơnŭm pơgơ̆r tơring 2 kâ̆p, xah pơtoi tơdrong jang "Tơmơ̆ng păng pơma dơnuh hăm kon pơlei", pơjing đei tơdrong hơ-iă vă kon pơlei kơtă tơroi gah dôm tơdrong tơnap tap, tơhlăk tơhlĭn păng đei tơmơ̆ng, tơblang kơtă hloi. Ƀok Trần Quang Thanh, kon pơlei tơ̆ xah Hàm Tân, dêh char Lâm Đồng tơroi: "Dôm hla bơ-ar tơrĕk truh groi teh noh pơngơ̆t dêh, mă lei gơnơm ah 'năr Puăn sơng pơma dơnuh hăm kon pơlei, đei khŭl kơdră tơ̆ hơnih jang pơtho ăn kơ nhôn pơm kiơ̆ dôm tơdrong kăl, 'noh hla bơ-ar đei pơm ƀônh păng tĕnh hloh".

'Năr puăn pơma dơnuh tơ̆ xah Hàm Tân, dêh char Lâm Đồng, dang ei hlôi jing hơnih mă kon pơlei tơroi gah lơ tơdrong, đơ̆ng hla bơ-ar pơkăp gah groi teh, trong nơnăm, tơdrong pơyua ăn tơpôl truh dôm tơdrong tơhlăk tơhlĭn lơ̆m pơm hla bơ-ar hanh chĭnh. Tơdrong jang đei jơnei hơdah ưh hơdrô̆ gah trong jang pơvih tơnăp đơ̆ng đe kang ƀô̆ xah, mă chih akŏm nơ̆r pơtruh đei pơm jang 'lơ̆ng, păng tơdrong pơtruh đơ̆ng xah adoi đei jơnei hơdah hloh.  

Truh dang ei, Hơnih jang vei lăng kon pơlei xah Hàm Tân hlôi pơtoi đei 16 'măng pơma dơnuh, chih akŏm hloh 523 nơ̆r pơtruh, pơhlom 20 nơ̆r pơtruh lơ̆m minh pơgê dah mă ah kơsơ̆. Đơ̆ng dôm tơdrong tơroi gah hla bơ-ar hanh chĭnh, trong nơnăm, groi teh truh hloi dôm tơdrong pơyua ăn kon pơlei, tôm đei đe kơdră tơring tơmơ̆ng, chih iŏk, vă akŏm tơblang dah mă pơtruh ăn hơnih juăt jang chă akŏm tơblang mă hơdah. Kiơ̆ kơ ƀok Nguyễn Thành Nam, Kơ-iĕng  Bí thư Đảng ủy, Kơdră Hơnih jang vei lăng kon pơlei xah Hàm Tân, ou ưh hơdrô̆ jĭ dôm tơdrong tơƀơ̆p nhen pơkăp đĕch ôh, mă oei jĭ pơkăp "pơma yak hơdoi hăm jang hloi", tơgŭm kon pơlei ƀôh nơ̆r pơma kơ po đei tơgĭt păng đei tơblang hơdah: "Tơgŭm ăn kon pơlei pơm hla bơ-ar hanh chĭnh ƀônh hiôk hloh păng gơh tơ-oei pơma dơnuh hơdai vă tơmơ̆ng dôm tơdrong hơpơi 'meh, tơdrong tơnap tap, tơhlăk tơhlĭn ah mă kon pơlei năm truh hăm jơnŭm pơgơ̆r tơring. Atŭm hăm 'noh, nhôn adoi chih akŏm, tơblang hloi dôm nơ̆r pơtruh gah pơ-'lơ̆ng jơnŭm pơgơ̆r tơring, vă jơnŭm jang roi năr roi 'lơ̆ng hloh. Hăm Hơnih pơvih pơm hla bơ-ar hanh chĭnh kŏng, nhôn hơnơ̆ng adrin dăp đon dăp bơnôh pơm jang 'lơ̆ng hloh ăn kon pơlei ah mă truh pơm dôm hla bơ-ar hanh chĭnh gĭt kăl".

Minh sơnăm tam mă sĭ jơ năr đunh đai ôh, mă lei gơh ƀôh hơdah tơdrong tơplih lơ̆m đon tơchĕng pơvih pơvăn kơ jơnŭm pơgơ̆r tơring 2 kâ̆p. Ah mă jơnŭm pơgơ̆r tơring kơchăng truh tơjê̆ hăm kon pơlei, tơmơ̆ng păng tơblang hơdah dôm tơdrong pơtruh đơ̆ng tơring, 'noh jĭ 'long pơtŏ gah trong jang tơplih 'lơ̆ng hla bơ-ar hanh chĭnh, pơm jang đei jơnei 'lơ̆ng gah tơdrong jang, mă oei pơjing đon lui 'lơ̆ng păng tơdrong sô̆ hơ-iă ăn kon pơlei.