‘Nâu jĭ nơ̆r athei đei tơlĕch tơ̆ Hop akŏm ‘măng mă 5 Khul kơdră chĕp kơ̆l Đảng ƀô̆ Anih vei lăng kon pơlei dêh char Lâm Đồng jăl jang đơ̆ng 2025 - 2030 ‘nao đei pơgơ̆r. Lơ̆m 6 khei blŭng sơnăm 2026, mă đơ̆ng tơjră hăm lơ tơdrong nol, pơmat tat mă lei Lâm Đồng oei iŏk đei lơ tơdrong ‘lơ̆ng lơ̆m lơ tơdrong jang. Thu mong jên ăn teh đak đei dang 18.600 ti, hơtŏ hăm 54% jên vă thu mong tơ̆ tơring.

Lơ̆m dêh char đei hlŏh 2.600 anih tĕch mơdro ‘nao đei pơjing, hăm jên đei kĭ pơkăp vă tơlĕch jang hlŏh 12.000 ti. Kơsô̆ tơmoi chă tơmang lăng truh tơ̆ Lâm Đồng đei dang 12 triu ‘nu bơngai, tŏk 18% pơting hăm khei âu sơnăm sơ̆. Ƀok Hồ Văn Mười, Kơdră vei lăng kon pơlei dêh char Lâm Đồng athei dôm anih jang đảng, kăn ƀô̆, đảng viên hơtŏk đon jang tơnăp, mât 1 ƀơ̆r đon, kơchăng, bơ̆ jang mă pran; akŏm jơhngâm tơlĕch jang hrơ̆ch ‘lơ̆ng dôm trong jang vă jang đei đon pơhnŏng jang tŏk mŭk drăm truh 2 kơsô̆ lơ̆m sơnăm 2026.