Lăp đơ̆ng rŏng tơlĕch jang kiơ̆, nơ̆r athei jang kiơ̆ hlôi tenh koăng mơ̆t lơ̆m tơdrong oei sa yan ou, roi năr roi hơnhăk đei hơ iă, pơjing jơhngơ̆m pran ‘nao vă kang ƀô̆, đang viên lơ̆m dêh char tơplih ‘nao jơhngơ̆m đon lơ̆m bơ̆ jang, jang sa, tơgop pơm hơtŏk mŭk drăm-tơpôl kơ tơring atŏk tơ iung.

         Jĭ đang viên sơnăm mơlôh lơ̆m Chi ƀô̆ pơlei Đạ Nghịt 1, tơring Lát, apŭng Lạc Dương, dêh char Lâm Đồng, ‘nhŏng Cil Ha Sip, hơdrung K’ho hlôi tĕnh koăng jang kiơ̆ Tơdrong tơchơ̆t Nơ̆r athei jang kiơ̆ 34 đơ̆ng Khul kơdră Đảng dêh char Lâm Đồng, atŏk kơtang jang kiơ̆ ‘lơ̆ng hơnăp jang, pơbech hơbal, tơchăr hơ iă, nơ̆r pơma tơ-‘ngla iung jang hloi kơ yuơ đei iŏk yua atŭm kơ kon pơlei pơla. ‘Ngoăih jang keh đang ‘lơ̆ng tơdrong đei pơjao jang tơ̆ Hơnih vei lăng kon pơlei tơring gah pơlei, Cil Ha Sip oei hơdrin choh jang sa, jang kiơ̆ trong jang chehphe kơjăp ‘lơ̆ng păng chă pơrô̆ hơvơn kon pơlei vang jang kiơ̆. Dang ei tơring Lat hlôi tơ iung pơjing HTX choh jang sa chehphe rơgoh, hăm mơjit ŭnh hnam kon pơlei kon kông vang iung jang kiơ̆ trong pơkăp tĕch răt dih băl. “Lăp đơ̆ng rŏng đei tơlech jang kiơ Nơ̆r athei jang kiơ̆ 34 găh dôm tơdrong đang viên kăl jang kiơ̆ păng dôm tơdrong đang viên kăl veh ver ‘noh ba hlôi iung jang kiơ̆ lơ̆m tơdrong hơrih sa kơ dih ba. Pơm jŭk yŭk trong hơlou vă ŭnh hnam păng rim bơngai vang jang kiơ̆”.

         Adoi nhen Cil Ha Sip, rim đang viên Chi ƀô̆ pơlei Păng Tiêng, tơring Lát adoi băt hlôh ƀôh hơdăh hơnăp jang pơm jŭk yŭk trong hơlou kơ đang viên lơ̆m jang kiơ̆ Nơ̆r athei jang kiơ̆ 34 kơ Khul kơdră Đảng dêh char Lâm Đồng. Kiơ̆ đơ̆ng ƀok Rơ Ông K’Thiên, Bí thư Chi bộ pơlei Păng Tiêng, ‘ngoaih 4 tơdrong kăl veh ver ‘noh đei: veh ver pơm glăi, iŏk yua sa pơgơ̆m; veh ver chă tơpuh dih băl, hli chiu pŭ; veh ver bơ̆ jang koă kơ lê̆, ưh hơnhăk đei jơnei; veh ver ngôi ‘mơng, ƀôh đe đei tơdrong ưh pơma … rim đang viên lơm chi ƀô̆ jei iung jang kiơ̆ ‘lơ̆ng 3 tơdrong kăl iung jang ‘noh: nơ̆r pơma tơ-‘ngla iung jang hloi, jang dôm tơdrong ƀlep kơ yuơ đei iŏk yua ăn tơpôl; jang đĭ jơhngơ̆m, đon tơchĕng hle; jang hơnhăk đei jơnei kơjăp hloh, ‘lơ̆ng hloh. Ƀok Rơ Ông K’Thiên, pơma:“Khul Kơdră Đảng tơring hlôi tơlĕch jang kiơ̆ Nơ̆r athei jang kiơ̆ 34 đơ̆ng Khul kơdră Đảng dêh char truh hăm rim đang viên păng rim chi ƀô̆ pơlei pơla. Đơ̆ng noh, Chi ƀô̆ pơlei hlôi tơlĕch jang kiơ̆ jơp jang nơ̆r athei jang kiơ̆ ou lơ̆m jơ hop akom chi ƀô̆, truh hloi lơ̆m rim ‘măng hop akom pơlei. Đơ̆ng noh rim đang viên păng kon pơlei lơ̆m pơlei jei jang kiơ̆ rim tơdrong đei tơlech lơ̆m nơ̆r athei jang kiơ̆ păng iung jang kiơ̆ kơtang, tơdrong hơrih sa pơlei pơla tơplih ‘nao, tơdrong lơ̆m pơlei ‘lơ̆ng hơ iă, tơgoăt tơgoăl dih băl ‘lơ̆ng hơ iă”.

Tơring Lát, apŭng Lạc Dương đei hloh 70% ‘nu kon pơlei ‘noh bơngai kon kông, găh lơ kon pơlei choh jang sa pơtăm ‘nhot păng jang chehphe. Mă đơ̆ng đei ƀơm kơnê̆ dôm tơdrong tơnap tap atŭm kơ tơdrong jang mŭk drăm lơ̆m teh đak, mă lei Mŭk drăm-Tơpôl kơ tơring oei vei kơjăp atŏk tơ iung. Lơ̆m ou, jang sa iŏk đei jô̆ hơtŏ măt bơngai hlôi iŏk đei vă jê̆ 50 triu hlak jên lơ̆m sơnăm, tŏk 5 triu hlak jên pơtêng hăm blŭng sơnăm 2024, ŭnh hnam dơnuh hlôi tơjur pă 2,6%, tơdrong jang tơ iung pơjing tơring tơrang ‘nao hơnhăk đei ‘lơ̆ng hơ iă hăm 17/19 trong tơlĕch jang hlôi jang keh đang v.v… 

Kiơ̆ đơ̆ng ƀok Lơ Mu Ha John, Kơ iĕng Kơdră chĕp pơgơ̆r Đảng tơring Lat, apŭng Lạc Dương, dêh char Lâm Đồng, tơdrong jơnei ou hlôi hơnhăk tơgop gĭt kăl kơ tơdrong tơlĕch jang kiơ̆ tơtom păng lang să kơtang Nơ̆r athei jang kiơ̆ 34 lơ̆m đang viên păng rim răih kon pơlei. “Lăp đơ̆ng rŏng tơlĕch jang kiơ̆ Nơ̆r athei jang kiơ̆ 34, găh lơ kang ƀô̆, đang viên păng kon pơlei jei tôch lăp đon, iung jang kiơ̆ păng atŏk jơhngơ̆m đon jang kiơ̆ ‘lơ̆ng dôm tơdrong kăl jang kiơ̆ păng kăl veh ver. Đơ̆ng noh, kon pơlei roi năr roi lui yom kơtang lơ̆m rim trong bơ̆ jang đơ̆ng Đảng păng Teh đak”.

Atŭm hăm Nơ̆r athei jang kiơ̆ 34, Khul kơdră chĕp pơgơ̆r Đảng dêh char Lâm Đồng jei hơnơ̆ng tơlĕch jang kiơ̆ Nơ̆r athei jang kiơ̆ 21, năr 25/10/2021 đơ̆ng Khul kơdră chĕp pơgơ̆r Trung ương Đảng tơklep kơjăp hăm atŏk tơ iung kơtang hŏk pơhrăm, pơm kiơ̆ jơhngơ̆m đon, trong jang hơgei kơ Ƀok Hô păng jang kiơ̆ ‘lơ̆ng jơhngơ̆m đon pơm jŭk yŭk trong hơlou kơ kang ƀô̆, đang viên, mă blŭng ‘noh bơngai chĕp kơ̆l. Đơ̆ng noh, pơjing đei tơplih ‘nao kơtang lơ̆m jơhngơ̆m đon tơchĕng păng trong jang kơ rim kơdră chĕp pơgơ̆r đảng, kơdră chĕp pơgơ̆r tơring, kang ƀô̆, đang viên lơ̆m jang kiơ̆ kơjăp dôm trong bơ̆ jang đơ̆ng Đảng, khôi luơ̆t Teh đak, pơjing hơyak pran ‘nao pơtrŭt kơtang tơdrong hơrih sa kơ rim pơlei pơla pơma hơdrô̆, mŭk drăm-tơpôl pơma atŭm kơ tơring atŏk tơ iung.