Tơ̆ xăh Bảo Lâm 2, đak đơ̆ng tu dôm đak krong ro jur tôch jăng, pơm ăn đak lơ̆p đơ̆ng 80cm truh 1,2 met tơ̆ lơ tơring kon pơlei oei xa. Khŭl kơdră tơring krao akŏm khŭl lĭnh, công an, druh dăm vang năm tơgŭm kon pơlei pơm hơdrơh tung, ming tơmam tơ̆ kơpal păng chông tơlĕch hloh 40 ŭnh hnam tŏk oei tơ̆ anih sơđơ̆ng. Dôm hnam hŏk hôp pơlei đei iŏk pơm anih oei pơgia.

Tơ̆ Đà Lạt, 'mi tih pơdui đunh kŭm pơm ăn đak lơ̆p tơ̆ lơ jăl trong. Tơ̆ phường Cam Ly - Đà Lạt, thong đak Tô Ngọc Vân đak tih tŏk blai trong, đei anih đak lơ̆p vă jê̆ 1 met, pơm ăn lơ gre ôtô ưh kơ gơh kơdâu. Mĭnh ƀar anih nai tơ̆ phường Lâm Viên - Đà Lạt păng phường Xuân Hương - Đà Lạt kŭm đei đak lơ̆p. Đơ̆ng rŏng kơ 'mi prăng, đak tơ̆ lơ anih hrŏ hrĕnh, khŭl jang kơpal păng kon pơlei akŏm jơhngâm kôch hơmet teh dơ̆k, hơmet pơ 'lơ̆ng hiong răm.