Hăm hơ năn “Đà Lạt – Pơ lei tơm (plt) puăn pơ yan pơ kao”, Festival pơ kao Đà Lạt ‘măng mă 9 sơ năm 2022 pơ gơ̆r lơ̆m 2 khei, đơ̆ng ‘năr 1/11 truh đĭ ‘năr 31/12. Kŭm hăm dôm tơ drong jang tơm đei pơ gơ̆r tơ̆ Đà Lạt, hlŏh 40 tơ drong jang nai đei pơ gơ̆r tơ̆ lơ tơ ring pha ra băl lơ̆m dêh char. Dang ei 1,2 tơ drong jang hlôi đei pơ gơ̆r tơ̆ 1,2 apŭng, plt lơ̆m dêh char nhen: Tơ drong hrŭk pơ rŏ ai tai, ming pơ dă dôm tơ mam đơ̆ng choh jang xa đei, tơ drong hơ lăk Vang ƀou phu ‘lơ̆ng… 

Đà Lạt hlôi hơ met đang ăn Festival pơ kao Đà Lạt ‘măng mă 9 sơ năm 2022

Ƀlep ƀât ‘măng mă âu vă pơ gơ̆r hloi tơ drong pơ dă tơ ƀôh dôm tơ mam đơ̆ng choh jang xa đei hăm hơ năn “Đà Lạt – tơ mam ‘lơ̆ng đơ̆ng groi tĕh ‘lơ̆ng”, pơ kao jĭ tơ drong tơm tŏk bŏk đei khul kơ dră tơ ring, kon pơ lei păng anih tĕch mơ dro hăt hơ met ming vă pơ yoa ăn tơ drong truh lăng đơ̆ng tơ moi, mă loi ƀât dôm anih ming pơ rŏ pơ kao lơ̆m tơ pôl, dôm jăl trong gre tơm păng tăp dăr dơ nâu Xuân Hương.