VOV4.Bahnar - Đơ̆ng blŭng sơ năm truh dang ei, dêh char Lâm Đồng đei ƀôh hloh 50 ‘măng phă bri, lơ̆m noh đei 14 ‘măng tam mă băt hơ dăh đei bơ ngai phă. Anih jang kơ pal hlôi pơm hla ar ƀiên ƀan hơ met pơ ‘lơ̆ng 47 tơ drong, lơ̆m noh đei 3 tơ drong sek phak, thu iŏk hloh 84m3 ‘long hơ pôm rim kơ loăi păng nôp jên ăn teh đak hloh 789 triệu hlak jên. Lơ̆m kơ sô̆ ‘nâu, krê hơ mơt hloh ‘noh 5 tơ drong phă bri tih đei ƀôh lơ̆m dôm apŭng Lạc Dương, Đam Rông păng Bảo Lâm. Dang ei anih jang kŏng an tŏk bŏk hơ nơ̆ng dăr hơ len, hơ met ming hla ar hô sơ vă sek phak dôm bơ ngai pơm glăi.

Kiơ̆ kơ Anih vei lăng găh choh jang sa păng hơ tŏk tơ iung tơ ring tơ rang dêh char Lâm Đồng, ưh khan lăp phă bri mă tơ drong tơ gar iŏk teh bri ‘long kŭm roi tŏk. Tơ drong tơm pơm ăn yua đơ̆ng ‘meh vă găh teh păng kơ jă teh tŏk măk, lơ bơ ngai ưh kơ mơ̆ng khôi luơ̆t, pơm kiơ̆ dôm tơ drong glăi tơ gar iŏk teh bri ‘long vă tĕch iŏk lơi glăi. Hăm dôm hơ găt teh âu, khŭl linh kơ pal hơ drin iŏk pơ dreo dơ̆ng păng pơ gơ̆r pơ tăm dơ̆ng bri, sek phak kơ tang dôm bơ ngai pơm glăi.

Thuem: Tơ blơ̆