VOV4.Bahnar - Giĕng âu ki, Jơ nŭm pơ gơ̆r kon pơ lei dêh char Lâm Đồng hlôi pơ gơ̆r ‘măng hop akŏm tŏk bŏk sơ năm, vă pơ ma dơ nuh păng tơ lĕch dôm trong jang hơ met pơ ‘lơ̆ng dôm tơ drong ưh kơ ‘lơ̆ng, hơ nơ̆ng pơ trŭt hơ tŏk mŭk drăm tơ pôl 6 khei hơ tuch sơ năm 2022. Lơ̆m noh, dêh char hơ nơ̆ng tơ lĕch jang đei yua Tơ drong jang tơm teh đak găh pơ jing tơ ring tơ rang ‘nao, tơ jur dơ nuh hin kơ jăp, tơ klep hăm tơ drong jang hơ tŏk tơ iung tơ ring kon pơ lei kon kông păng tơ ring groi kông, mă loi ‘noh jĭ tơ drong vei lăng, tơ lĕch jang tơ mơ̆t jên jang đei iŏk yua dôm kon jên ‘nao đei Kuôk hô̆i, Khŭl kơ dră teh đak klăih song ăn.

Kiơ̆ tơ roi tơ băt tơ̆ ‘măng hop akŏm mă 6 Jơ nŭm pơ gơ̆r kon pơ lei dêh char Lâm Đồng (jăl X), 6 khei blŭng sơ năm 2022, mŭk drăm - tơ pôl kơ tơ ring iŏk đei lơ jơ nei ‘lơ̆ng hơ iă. Lơ̆m noh, ‘lơ̆ng hloh ‘noh jĭ mŭk drăm tŏk 9,29%; thu mong jên jang teh đak iŏk đei 7.800 ti hlak jên, hơ tŏ 71,5% jên tơ chĕng hơ drol kơ tơ ring păng tŏk hloh 22% pơ têng hăm khei ‘nâu sơ năm hơ drol. Akŏp jên tĕch tơ mam tơ̆ teh đak đe kŭm iŏk đei 436 triệu đô lar, tŏk 43%; păng tơ moi tơ mang lăng đei hloh 3,7 triệu ‘nu, tŏk 86,5% pơ têng hăm khei ‘nâu kơ sơ năm 2021. Dôm tơ drong jang vei lăng sơ đơ̆ng tơ drong arih sa tơ pôl, tơ jur tơ duh hin, vei sơ đơ̆ng chĭnh trĭ păng sơ đơ̆ng tơ pôl đei vei ‘lơ̆ng.

Hơ dai hăm jơ nei iŏk đei, Lâm Đồng oei đei tơ jră hăm lơ mơ mat tat, ưh kơ ‘lơ̆ng, mă loi ‘noh jĭ hăm tơ drong jang vei lăng bri, vei lăng tơ mam drăm lơ̆m teh, teh, chĕng hơ met teh... Pơ ma pơ gơ̆r blŭng hop akŏm, ƀok  Trần Đức Quận, Bơ ngai jang lơ̆m Khŭl chĕp kơ̆l Trung ương Đảng, Bí thư Anih jang Đảng dêh char, Kơ dră Jơ nŭm pơ gơ̆r kon pơ lei dêh char Lâm Đồng akhan, ‘nâu jĭ dôm tơ drong tơ hlăk kăl kơ đei akŏm pơ ma dơ nuh, tơ blang hơ dăh, tơ chă trong jang vă hơ met pơ ‘lơ̆ng, pơ trŭt mŭk drăm tơ pôl hơ tŏk tơ iung. Ƀok Trần Đức Quận, pơ ma:

Tơ̆ ‘măng hop akŏm âu, dôm bơ ngai tang măt Jơ nŭm pơ gơ̆r kon pơ lei dêh char akŏm tơ chĕng hơ len rim tơ drong, pơ ma dơ nuh, tơ blang hơ dăh, tơ ƀôh rơ đăh tơ drong tơm pơm ăn dôm jơ nei iŏk đei kŭm nhen dôm tơ drong oei đei, ưh kơ ‘lơ̆ng, tơ lĕch dôm trong jang vă hơ met pơ ‘lơ̆ng dôm tơ drong tơ hlăk lơ̆m kơ plăh hơ tŏk tơ iung mŭk drăm tơ pôl, vei sơ đơ̆ng chĭnh trĭ păng sơ đơ̆ng tơ pôl tơ̆ tơ ring.”

‘Măng hop akŏm mă 6 Jơ nŭm vei lăng kon pơ lei dêh char Lâm Đồng

Tơ̆ ‘măng apĭnh jet păng tơl nơ̆r apĭnh jet, kơ dră chĕp kơ̆l dêh char Lâm Đồng pơ ma hơ dăh yua đơ̆ng pơm pơ hơi lơ̆m vei lăng teh plang song pơm trong hlôi pơ dui kiơ̆ lơ tơ drong ƀơm truh. Lơ̆m noh, pơ lei tơm Bảo Lộc păng apŭng Bảo Lâm đei lăng ‘noh jĭ dôm hơ nih tơ tŏ đei ƀôh tơ drong plang song teh pơm trong nơ năm, đơ̆ng rŏng ‘noh chĕng teh pơm hnam tơ̆ dêh char Lâm Đồng. Kiơ̆ chih jô̆ tam mă tôm đơ̆ng anih jang kơ pal, đei tŏ sĕt hloh 50hek tar kơ vă jê̆ 200 ‘nu hlôi đei plang song ăn teh đak, lơ̆m noh đei bơ ngai plang song hăm teh să tŏk truh 10hek tar. Tơ drong kăl kơ tơ roi, đơ̆ng rŏng kơ plang song teh ăn kơ teh đak, kon pơ lei chă pơ̆ih kơ dih trong nơ năm, pơm ƀê tŏng nhươ̆ tŏ păng pơm tơ ƀưh hăm dôm trong nai lơ̆m tơ ring.

Ƀok Trần Văn Hiệp, Kơ dră Anih vei lăng kon pơ lei dêh char Lâm Đồng akhan, tơ drong kon pơ lei plang song teh pơm trong găh lơ pơ yua ăn kơ dih vă đei tôm tơ drong vă chĕng song kiơ̆ tơ drong hơ găt. Găh lơ dôm apŭng, pơ lei tơm adoi ưh pơm hla ar vă sơng iŏk, vei lăng teh đei plang song, ƀơ̆t mă dôm teh âu lăp ƀơ̆t đei tơ drong tơ chơ̆t iŏk pơ dreo hlôi găh tơ drong vei lăng đơ̆ng teh đak. Vă kon pơ lei, dôm ŭnh hnam, rim bơ ngai jang kiơ̆ kơ dih pơm trong nơ năm ưh kơ vei sơ đơ̆ng hăm trong pơ proh jang păng hơ găt đơ̆ng khôi luơ̆t. Dui kiơ̆ tơ drong chĕng tĕh pơm hnam, pơ jing dôm hơ nih kon pơ lei chă pơm kơ dih đang kơ ‘noh tĕch. Ƀok Trần Văn Hiệp, tơ roi:

 “Tơ drong plang song teh pơm trong nơ năm ‘nao tơ pă ‘noh jĭ pơ jing dôm hơ nih kon pơ lei oei ‘nao vă roi tơ ƀôh. Anih vei lăng kon pơ lei apŭng Bảo Lâm, pơ lei tơm Bảo Lộc ăn phep dôm ŭnh hnam, kơ dih tơ plih đơ̆ng teh choh jang sa jing teh oei mă tam mă đei vei sơ đơ̆ng dôm tơ drong chĕng hơ met teh nai đei ƀơm truh. Hơ nhăk truh đei ƀôh lơ tơ drong lơ̆m tơ drong jang vei lăng chĕng hơ met teh, ming man lơ̆m tơ ring, pơm blĕk kơ đon lơ̆m tơ pôl păng ƀơm ưh kơ ‘lơ̆ng truh bưng ai, um rup kơ tơ ring Lâm Đồng. Dêh char hlôi đei hla ar athei rim anih jang, tơ ring bơ̆ jang kiơ̆ ƀlep tơ drong ƀơm truh chĕng song teh ‘nao tơ lĕch ăm lơ̆m blŭng khei 7. Vei sơ đơ̆ng yua kơ tơ drong đei yua ăn kon pơ lei, anih jang mơ dro sa mă lei hơ dai hăm vei sơ đơ̆ng tơ drong jang jên hu hăm Teh đak.”

Pơm pơ hơi vei lăng teh plang song teh pơm trong pơm ăn lơ tơ drong ƀơm truh

Kiơ̆ lơ̆m hơ len lăng pơ tôch jang kiơ̆ dôm hơ năp jang mŭk drăm - tơ pôl 6 khei blŭng sơ năm 2022 păng tơ dra hơ drol tơ drong tơ̆ hơ năp kơnh; anih vei lăng kon pơ lei dêh char Lâm Đồng hlôi drơ̆ng nơ̆r găh trong jang kiơ̆ hơ năp jang hơ tŏk tơ iung mŭk drăm - tơ pôl 6 khei hơ tuch sơ năm 2022 hăm hơ drin jang đang yak hloh dôm tơ drong hơ găt tơ lĕch ăn mă Anih vei lăng kon pơ lei dêh char hlôi băt hơ dăh; hơ dai hăm, sơ kơ̆t hơ dăh dôm grŭp trong jang tơm kăl kơ akŏm bơ̆ jang kiơ̆ tơ̆ hơ năp kơnh nhen: Hơ nơ̆ng dăr hơ len, hơ len lăng dôm tơ drong hơ găt, hơ năp jang kiơ̆ tơ drong tơ chơ̆t đơ̆ng Anih jang Đảng dêh char păng Jơ nŭm vei lăng kon pơ lei dêh char găh hơ tŏk tơ iung mŭk drăm - tơ pôl, vei sơ đơ̆ng teh đak sơ năm 2022; hơ dai hăm jang kiơ̆ rim khei, rim jăl khei vă bơ̆ jang kiơ̆ đei iŏk yua dôm tơ drong tơ chơ̆t đơ̆ng Kuôk hô̆i, đơ̆ng Khŭl kơ dră teh đak găh dôm trong jang athei vei lăng bơ̆ jang kiơ̆ trong tơ lĕch jang hơ tŏk tơ iung mŭk drăm - tơ pôl păng jên jang teh đak sơ năm 2022. Kơ chăng jăh pơ jing trong tơ lĕch jang hơ tŏk tơ iung mŭk drăm - tơ pôl păng jên jang teh đak sơ năm 2023; trong vă jang jang tơ mơ̆t jên jang teh đak sơ năm 2023. Hơ nơ̆ng tơ lĕch jang đei yua Tơ drong jang tơm teh đak găh pơ jing tơ ring tơ rang ‘nao, tơ jur dơ nuh hin kơ jăp, tơ klep hăm tơ drong jang hơ tŏk tơ iung tơ ring kon pơ lei kon kông păng tơ rong groi kông, mă loi ‘noh jĭ tơ drong vei lăng, tơ lĕch jang tơ mơ̆t jên jang đei iŏk yua dôm jên ‘nao đei Kuôk hô̆i, Khŭl tơ dră teh đak klăih song ăn.

VOV Tây Nguyên

Thuem: Tơ blơ̆