Gơnơm bơ̆ jang pran păng hrơ̆ch ‘lơ̆ng dôm trong jang, mŭk drăm, tơpôl sơnăm 2022 kơ dêh char Lâm Đồng hơnơ̆ng vei kơjăp tơdrong jang tŏk, iŏk đei lơ tơdrong jơnei gĭt kăl lơ̆m rim tơdrong. Đĭ đăng 18 tơdrong hơgăt đei jang kĕh păng tŏk lơ hlŏh nơ̆r pơkăp đei tơlĕch.

Hơ iă hlŏh jĭ tơdrong jang tŏk mŭk drăm tơ̆ dêh char, iŏk đei truh 11,84%; thu mong jên ăn tĕh đak 13.000 ti, tŏk 2.000 ti pơ têng hăm kơsô̆ hơgăt păng tŏk hlŏh 18% pơtêng hăm sơnăm adrol sơ̆; akŏm đĭ đăng jên tĕch mơdro tơ̆ tĕh đak đe đei hlŏh 886 triu USD; iŏk yoa jô̆ păh lăp kiơ̆ kơ̆l bơngai đei 75,3 triu hlak jên; sơng đei 7 triu ‘nu tơmoi truh chă tơmang lăng, tŏk 340% pơtêng hăm khei âu sơnăm sơ̆. 

Pơma tơ̆ hop akŏm, ƀok Trần Văn Hiệp, Kơdră vei lăng kon pơlei dêh char Lâm Đồng pơma hơdăh, dôm tơdrong tam mă pran ‘lơ̆ng oei đei lơ̆m sơnăm ‘nâu gô đei hơmet pơ ‘lơ̆ng lơ̆m sơnăm 2023. Lơ̆m nŏh, kăl tơrĕk truh tơdrong chih pơ jing trong jang păng bơ̆ jang đei yoa ‘lơ̆ng tơdrong Tơchơ̆t 23 đơ̆ng Anih tơm Chinh trĭ hăm dôm tơdrong jang, tơmam drăm tôch rơđăh.