Đơ̆ng lơ khei ‘nâu, ‘nhŏng K’Sáu, ƀok pơgơ̆r plei K’Rèn, xăh Hiệp Thạnh, dêh char Lâm Đồng hơnơ̆ng roi tơbăt Luơ̆t pôk rơih, pơma truh tơdrong hơgăt rơđăh rơđong, hơtŏ băl păng năm tăh kơphĭu kơdih; atŭm hăm ‘nŏh roi tơbăt dôm tơdrong hơgăt hăm bơngai lĕch pơjei, trong pơgơ̆r pơma nuh, chih hơnăn bơngai tăh hla.

Kiơ̆ ‘nhŏng K’Sáu, tơdrong pơm kiơ̆ tơdrong hơgăt gô tơgop ‘lơ̆ng ăn tơdrong pôk rơih vă pơgơ̆r lơ̆m ‘năr 15/3 truh âu kơnh gơ̆h pơgơ̆r tơpăt ‘lơ̆ng, trŏ luơ̆t, sơđơ̆ng ‘lơ̆ng hơiă păng bơngai tăh hla tơ̆ pơlei gô rơih đei bơngai tang măt tơgăl hlŏh: “Hăm hơnăp jang đơ̆ng inh chă roi tơbăt ăn mih ma duch nă găh tơdrong pôk rơih, găh bơngai vă rơih bơ̆ jang. Ƀôh kon pơlei hơiă ‘mĕh mơ̆ng rim nơ̆r tơroi. ‘Nao âu lơ̆m hop akŏm tơ̆ pơlei đei 2 ‘nu bơngai, 1 ‘nu drŏ nglo păng 1 ‘nu drŏ kăn vă pôk rơih pơm bơngai tang măt Jơnum pơgơ̆r kon pơlei xăh truh âu kơnh. Kon pơlei lăp đon drơ̆ng 1 nơ̆r”.

Tơ̆ dêh char Lâm Đồng, vă bơngai tăh hla păng kon pơlei băt hơdăh tơdrong pôk rơih, Khul chĕp kơ̆l Đảng, Mặt trận Tổ quốc păng rim khul jang chinh trĭ tơpôl hŏk pơhrăm, hlôh vao kơjăp tơdrong tơchơ̆t kơsô̆ 46 ‘năr 16/5/2025 đơ̆ng Anih tơm Chinh trĭ, tơdrong Tơchơ̆t kơsô̆ 02 ‘năr 23/9/2025 đơ̆ng Khul kơdră chĕp kơ̆l đảng dêh char găh pơgơ̆r pôk rơih bơngai tang măt Quốc hội khóa XVI păng bơngai tang măt Jơnum pơgơ̆r kon pơlei jơ̆p tơring đơ̆ng 2026 – 2031.

Đơ̆ng noh Mặt trận Tổ quốc, dôm khul grŭp jang chinh trĭ – tơpôl jang hơdoi hăm anih jang kơpal akŏm jơhngâm roi tơbăt dôm tơdrong ‘nao lơ̆m Khôi luơ̆t tơm sơnăm 2013 đơ̆ng rŏng kơ hơmet ming, chih tơmât dơ̆ng 1,2 tơdrong păng Luơ̆t pơgơ̆r Khul kơdră tơring (đei chih hơmet); Luơ̆t hơmet ming, chih tơmât dơ̆ng 1,2 tơdrong mưh pôk rơih bơngai tang măt Quốc hội păng bơngai tang măt Jơnŭm pơgơ̆r kon pơlei; dôm hla ar chih kăl, nơ̆r pơtho đơ̆ng dôm anih jang kơpal, đơ̆ng Anih vei lăng pôk rơih teh đak…

Ƀok Mai Linh Sơn, Kơdră Anih MTTQ Việt Nam xăh D’ran, dêh char Lâm Đồng ăn tơbăt: “Mặt trận jang hơdoi hăm Anih vei lăng kon pơlei, Anih roi tơbăt pơgơ̆r tơroi tơbăt tơ̆ yăn âu. Mă 2 ‘nŏh roi tơbăt hăm Zalo păng roi tơbăt kiơ̆ đơ̆ng dôm ‘măng hop akŏm iŏk nơ̆r tơgop đơ̆ng bơngai tăh hla tơ̆ tơring oei xa vă đe pơm kiơ̆ ‘lơ̆ng hơnăp jang kơdih kiơ̆ Luơ̆t pôk rơih. Pơm ‘lơ̆ng vă kon pơlei hlôh vao đĭ dôm tơdrong ƀơm truh hơnăp jang đơ̆ng kon pơlei mưh vang pơjing khul kơdră pơgơ̆r tơring. Pơm thoi yơ vă bơngai tang măt ăn Jơnŭm pơgơ̆r kon pơlei gơ̆h tơgăl jĭ bơngai dơ̆ng tang ăn đon tơchĕng păng tơdrong hơpơi ‘mĕh ăn kon pơlei”.

Ƀok Trần Hùng Dũng, Kơdră vei lăng kon pơlei xăh Đơn Dương, dêh char Lâm Đồng ‘nŏh ăn tơbăt: “Kiơ̆ đơ̆ng aloa roi tơbăt, đang kơ ‘nŏh jĭ trang điên tư păng dôm kênh nai hlôi roi tơbăt tôch rơđăh ăn kon pơlei tơ̆ tơring. Đơ̆ng noh kon pơlei hlôh vao hơnăp jang kơdih, hlôh vao tơcdrong gĭt kăl đơ̆ng pôk rơih kơna vang truh akŏm, vang tơgop ăn tơdrong pôk rơih Quốc hội păng Jơnŭm pơgơ̆r kon pơlei jơ̆p tơring truh âu kơnh gơ̆h pơgơ̆r đang ‘lơ̆ng”.

Vă năr pôk rơih bơngai tang măt Quốc hội păng bơngai tang măt Jơnŭm pơgơ̆r kon pơlei jơ̆p tơring ‘năr 15/3 truh âu kơnh gơ̆h pơgơ̆r sơđơ̆ng ‘lơ̆ng, tơpă jĭ jơnăr bơ̆ jang chinh trĭ tih, jĭ năr “Chơt hơiă kơ teh đak”, đơ̆ng rŏng kơ Hop akŏm pơma nuh ‘măng mă 3 âu ki, tơdrong roi tơbăt găh tơdrong chinh trĭ gĭt kăl kơ teh đak âu đei dêh char Lâm Đồng hơtŏk hlŏh dơ̆ng vă hơtŏk tơdrong drơ̆ng pôm nơ̆r, lăp đon đơ̆ng kon pơlei.

Kŭm hăm roi tơbăt tơpăt hăm bơngai tăh hla păng kon pơlei, 124 xăh, phường, tơring gĭt kăl kơ dêh char chô̆ hơtol hlŏh 2.600 panô roi tơbăt găh pôk rơih; hơtol hlŏh 3.000 hla kơ; kơmăy roi tơbăt pơih pơre kiơ̆ jơnăr hăm lơ tơdrong găh Luơ̆t pôk rơih, hơnăp jang đơ̆ng bơngai tăh hla. Tơ̆ dôm trong glung, cham xă, ngôi pơchơt ‘lơ̆ng rŏ lơ̆m tơpôl tơ̆ phường Xuân Hương - Đà Lạt, Bắc Gia Nghĩa, Phan Thiết, Hàm Thắng… pơjing đei lơ anih roi tơbăt găh pôk rơih, tưk tơiung jơhngâm hưch hanh, ‘nă hal păng vang tơgop pơm hơtŏk đon hlôh vao găh tơdrong gĭt kăl, hlôh vao hơnăp jang kơdih đơ̆ng rim bơngai tăh hla.

Yă Phạm Thị Phúc, Phó Bí thư Đảng dêh char, Kơdră Anih MTTQ Việt Nam dêh char Lâm Đồng, ăn tơbăt, tơ̆ dôm xăh hơtăih yăih, tơring đei lơ kon pơlei kon kông păng kon pơlei kiơ̆ lui khop vă tơdrong roi tơbăt găh pôk rơih iŏk đei jơnei ‘lơ̆ng, Mặt trận tưk tơiung hơnăp jang đơ̆ng vă jê̆ 900 ‘nu bơngai đei kon pơlei lui yom, đe ƀok pơtho lui khop vă vang yak hơdoi hăm khul kơdră tơring:

“Mặt trận iŏk hơnăp jang tơm mưh jang hơdoi hăm dôm anih jang kơpal chă krao hơvơn, pơtâp pơhrăm roi tơbăt tơƀôh trong ăn bơngai đei kon pơlei lui yom, đe ƀok pơtho lui khop tơ̆ tơring kon kông, tơring đei lơ kon pơlei lui khop vă roi tơbăt. Hơnơ̆ng pơma nuh, roi tơbăt kŭm nhen pơtâp pơhrăm vă kon pơlei hơtŏk đon tơnăp. Hăm bơngai pơtho lui khop ‘nŏh hơnơ̆ng pơvei oei xa ‘lơ̆ng hơiă, mât 1 ƀơ̆r đon păng vang jang hơdoi kơjăp ‘lơ̆ng hăm khul kơ dră tơring vă roi tơbăt, krao hơvơn pơm lăp hăm rim nơ̆r athei”.          

Hăm tơdrong vang mât bơ̆ jang hrơ̆ch ‘lơ̆ng đơ̆ng rim anih jang chinh trĭ; đon kơchăng, gơ̆h hơgei mưh roi tơbăt, kŭm hăm đon tơnăp, drơ̆ng pôm nơ̆r đơ̆ng kăn ƀô̆, đảng viên păng đĭ đăng kon pơlei, dêh char Lâm Đồng oei hơmet đang ‘lơ̆ng rim tơdrong ăn ăn năr chơt tih đơ̆ng đơ̆ng kon pơlei 15/3. Đơ̆ng tơring hơtăih yăih truh tơring kơdrâm, jơhngâm đon hue lăng truh năr pôk rơih bơngai tang măt Quốc hội jăl XVI păng bơngai tang măt Jơnŭm pơgơ̆r kon pơlei jơ̆p tơring jăl jang đơ̆ng 2026 – 2031 tơ̆ dêh char Lâm Đồng oei tŏk pran ‘lơ̆ng.