Tơ̆ lêh pơtơm, tơring tơbang 5 khŭl hơdruh tơdăm pơhnŏng vă jang đei: pơtho gah kon pơlei kơsô̆; tơgŭm pơtơm iŏk yua VNeID; tơgŭm pơm kăng kuơ̆k, chih pơlang măt điê̆n tưh ăn đe hŏk tro; tơroi tơbăt gah trong jang pơvih trư̆k tuyê̆n; hơlen, chih akŏm dôm tơdrong tơhlăk tơhlĭn đơ̆ng kon pơlei lơ̆m tơdrong iŏk yua kơmăi kơsô̆. Rim khŭl jang đei hloi đe kŏng ang tơ̆ tơring păng đoan viên hơdruh tơdăm vang jang.

Kiơ̆ kơ 'nhŏng Nguyễn Thành Huy Hoàng, Ƀĭ thư Chi đoan Kŏng ang phương Xuân Trường – Đà Lạt, tơdrong jang đei pơtơm gơh hơgei păng drơ̆ng minh, iŏk yua tơnăp tơdrong jang kơ khŭl kơmăi kơsô̆ tơ̆ pơlei pơla kiơ̆ pơkăp “truh rim unh hnam kon pơlei, pơtho ăn rim măt kon pơlei”, mă kăl noh tơgŭm ăn bơngai 'lŏ sơnăm, bơngai kue kêp păng dôm bơngai ƀơm tơnap tap gah kơmăi kơmŏk tơchăr 'nao dang ei.