Apŭng Đạ Huoai đei pơjing kiơ̆ lơ̆m tơmơ̆t hơdăh 3 apŭng găh Pơbăh kơ dêh char Lâm Đồng, ‘noh đei Đạ Huoai, Đạ Tẻh, Cát Tiên. Tơ̆ jơ pơm lêh, Khŭl pơgơ̆r roi tơbăt hơdăh tơdrong tơchơ̆t pơjing Đảng bộ apŭng Đạ Huoai. Hơdai hăm ‘noh, Khŭl chĕp kơ̆l pơgơ̆r Anih jang Đảng dêh char Lâm Đồng tơchơ̆t pôk Khŭl chĕp kơ̆l pơgơ̆r, Bí thư, Phŏ Bí thư Đảng apŭng Đạ Huoai jăl jang 2020-2025. Ƀok Nguyễn Quý Mỵ (Bí thư Đảng apŭng Đạ Huoai so) đei pôk pơm Bí thư Đảng apŭng Đạ Huoai (‘nao).

Pơma tơ̆ Lêh roi tơbăt hơdăh, ƀok Nguyễn Thái Học, Bí thư Anih jang Đảng dang ei dêh char Lâm Đồng pơma hơdăh, tơdrong tơmơ̆t 3 apŭng găh Pơbăh jing 1 apŭng ‘nao ‘noh jĭ tơdrong jang gĭt kăl, jang kiơ̆ ‘lơ̆ng trong jang tih đơ̆ng Trung ương păng đơ̆ng dêh char. Nâu kŭm jing tơdrong hiôk ‘nao vă jang ‘lơ̆ng, akŏm dôm kon jên hơtŏk tơiung mŭk drăm - tơpôl, tơgop pơm tŏ sĕt bơngai jang, hơtŏk ‘lơ̆ng đei yua tơdrong jang đơ̆ng khŭl kơdră tơring lơ̆m tơdrong ‘nao.