VOV4.Bahnar - ‘Năr 9/8, Anih vei lăng găh trong nơ năm gre kơ dâu Lâm Đồng tơ băt anih jang tŏk bŏk hăt hot pơ trŭt tơ drong hơ met ming vă jê̆ 5 km trong koĕch koĕl Mimosa - trong uơ oei dơ̆ng đĭ hư kơ tang đơ̆ng rŏng khei ‘năr đunh gô hơ met ăn kon jên pơm. Trong koĕch koĕl Mimosa, trong gre tơm mơ̆t lĕch lơ̆m pơ lei tơm Đà Lạt (Lâm Đồng) kơ jung vă jê̆ 11 km. ‘Nâu jĭ trong gre ‘măn ăn kơ dôm kơ loăi gre tih trăp hloh 1,5 tấn kơ dâu vă tơ jur tơ drong trăp ăn trong koĕch koĕl Prenn. Mă lei, yua kơ đơ̆ng gre kơ dâu vih vơ̆t lơ kơ na trong koĕch koĕl Mimosa đĭ tơ tĕnh kơ nê̆ kơ tang.

Vă jê̆ 5km trong koĕch koĕl đei hư, kơ nê̆ tôch kơ dêh

Khei 6/2021, Anih tơm vei lăng găh trong nơ năm gre kơ dâu hơ met ăn jên vă Anih vei lăng găh trong nơ năm gre kơ dâu Lâm Đồng pơm tơ ‘ngla tơ mơ̆t jên jang, bơ̆ jang kiơ̆ pơm hơ met ming. Yua kơ jên đei asong lăp 34,5 ti hlak jên đơ̆ng jên mong vei lăng trong nơ năm, tơ drong vei lăng ưh khan lăp bơ̆ jang kiơ̆ đei dang 6 km, vă jê̆ 5km uơ oei dơ̆ng ‘noh ưh kơ đei hơ met ming kơ na roi ‘năr roi hư dêh. Dang ei jên hơ met ming vă jê̆ 5km trong uơ oei dơ̆ng đơ̆ng trong koĕch koĕl Mimosa hlôi đei Anih tơm vei lăng găh trong nơ năm gre kơ dâu hơ met ăn jên, dêh char Lâm Đồng gô tơ tĕnh iŏk jang păng tơ chĕng hơ drol pơm đang lơ̆m khei 11 truh.

Thuem: Tơ blơ̆