Tơ̆ pơm lêh, rim kơdră tang măt hlôi pơma tơbăt dơ̆ng jăl trong tơ iung pơjing, iung tơblăh păng atŏk tơ iung kơ Khul Kŏng ang vei lăng sơđơ̆ng tơring, đơ̆ng dôm khul blŭng a lơ̆m kơdrăn tơblăh Khu VI lơ̆m dôm sơnăm 1960 truh đei jing khul gơh hơgei pran kơtang dang ei. Iung pơma tơ̆ pơm lêh tơbăt, Thiếu tướng Trương Minh Đương, Kơdră chĕp pơgơ̆r Kŏng ang dêh char Lâm Đồng, athei khul kŏng ang vei lăng sơđơ̆ng hơnơ̆ng minh nơ̆r ƀơ̆r đon kiơ̆ Đảng, teh đak păng Kon pơlei; atŏk kơtang jơhngơ̆m đon nuih mơng chinh trĭ, bơ̆ jang gơh hơgei, băt hlôh ƀôh hơdăh khoa hŏk-kmăi kmŏk, tơ iung pơjing khul rơgoh ‘lơ̆ng, pran kơtang, trŏ lăp ăn tơdrong vei lăng năng tông sơđơ̆ng teh đak lơ̆m chăl hle. Jơ ‘năr ou, lơ khul, rim bơngai đei pôk ăn Mê đai Vei lăng năng tông Teh đak dơ̆ng mă Pêng, Hla bơar pôk bơnê đơ̆ng Thủ tướng teh đak, Hơnih tơm Kŏng ang păng Hơnih vei lăng kon pơlei dêh char Lâm Đồng.