Akŏp kon jên teh đak vă tơmơ̆t jang lơ̆m sơnăm 2026 kơ Lâm Đồng đei Thủ tướng teh đak pơjao ăn vă jê̆ 14.900 ti hlak jên. Trŭh tŏk bŏk khei 6, dêh char ‘nao tơlĕch hloh 2.074 ti hlak jên, jơnei tim mă truh 14% trong tơlĕch jang. Tơdrong tơm jĭ kơ yuơ lơ tơdrong vă jang tơlĕch jang đơ̆ng đơ̆ng sơnăm hơdrol lơ oei hiơ hiơ̆ lơ̆m bơ̆ jang hơmet ăn tơmơ̆t jên jang, iŏk tơvih teh, pơm pơkeh hla bơar; tơdrong iung jang hơdoi ƀar păh rim hơnih bơ̆ jang đơ̆ng rŏng hơgrop tim mă hrơ̆p dih băl. Bí thư Đảng dêh char Lâm Đồng Y Thanh Hà Niê Kđăm hơlen: Tơlĕch kon jên teh đak tơmơ̆t jang tŏk bŏk jĭ mĭnh lơ̆m dôm trong bơ̆ jang tim mă keh đang kơtang hloh kơ dêh char. Ƀok athei khul kơdră chĕp pơgơ̆r tơring 2 kâp păng rim hơnih bơ̆ jang akŏm hơmet pơ ‘lơ̆ng rim tơdrong tơhlăk tơhlin vă atŏk kơtang iung jang rim tơdrong vă jang kăl, xek tơlang rim tơdrong vă jang iung jang tim mă keh đang, pơm hơtŏk jơnei tơlĕch kon jên tơmơ̆t jên jang.