Tơ̆ dôm hnam trưng tơ̆ phường Tiến Thành (tơring plt Phan Thiết, Bình Thuận so), dôm tơdrong pơmat tat vă tơmât yoa kơmăy sô̆ tŏk bok đei hơmet ming vă gơ̆h hơnhăk ba tơdrong đei yoa roi ‘lơ̆ng ƀiơ̆. Đĭ đăng hnam trưng jăl mônh, jăl ƀar đei lăm hŏk tin hŏk đei tôm kơmăy vi tĭnh, kơmăy pơm phim, aloa, man hinh tivi. Lăm chă đŏk hla ar kŭm đei răt hơmet kơmăy tĭnh vă tơchă dôm kơsơ̆p hla ar kăl gơ̆h ƀônh hiôk ƀiơ̆. Đe thây kô iŏk yoa kơmăy roi tơbăt mưh pơtho, chih hơmet ƀai pơtho hăm kơmăy điên tư.

Tơplih ăn kơƀang găm, chŭr kok, jơ pơtho hok đơ̆ng kô Doãn Kim Trúc, pơtho tơ̆ Hnam trưng jăl mônh Đức Long, phường Tiến Thành đei tơmât yoa hăm kơmăy sô̆ đei kơmăy phần mềm, um rup, video tôch hơiă: “Kơdih kâu inh ‘năi thoi noh mơ̆n, mưh ba hŏk, đei hloi um rup, năng ƀôh tôch hơiă ‘nŏh sư huei kơ hăl. Mĭnh kơsô̆ hŏk tro tam mă juăt hăm anih hŏk pơhrăm jăl mônh, ‘nŏh tơdrong ‘nâu sư pơm ăn đe oh pơm juăt roi ƀônh ƀiơ̆”.

Hnam trưng jăl mônh Đức Long, phường Tiến Thành đei 2 hnam hŏk, gơnơm đei kơmăy sô̆ kơna tơdrong vei lăng kăn ƀô̆, thây kô, bơngai jang păng hŏk tro kŭm roi hiôk ƀiơ̆ kiơ̆ đơ̆ng dôm grŭp lơ̆m mang tơpôl. Ƀok Võ Thanh Long, Thây hiê̆u trơng Hnam trưng jăl mônh Đức Long, phường Tiến Thành ăn tơbăt: “Hnam trưng hlôi iŏk yoa lơ phần mềm lơ̆m tơdrong jang nhen: phần mềm vei lăng kơsô̆ chih răk tơ̆ yăn âu, phần mềm thu jên đơ̆ng mĕ ƀă hŏk tro păng mĕ ƀă hŏk tro hlôi nôp jên kiơ̆ phần mềm âu. Hnam trưng răt hơmet hloi kơmăy tơ̆ anih đŏk hla ar hăm 4 tŏ kơmăy vi tĭnh vă hŏk tro lơ̆m jơ pơm ngôi jur chă hơlen năng rim tơdrong đe oh kăl lơ̆m Google vă gơ̆h băt dơ̆ng lơ tơdrong.”

Dôm hnam trưng nai tơ̆ phường Tiến Thành kŭm tơmât yoa kơmăy sô̆ đơ̆ng tơdrong vei lăng hŏk tro, pơjao ƀai tơ̆p, chih hơmet ƀai pơtho truh pơgơ̆r pơtho tơ̆ lăm. Mă loi, tơdrong iŏk yoa kơmăy pơm phim păng dôm kơmăy điên tư lơ̆m jơ hŏk tơgŭm ăn ƀai pơtho roi hơiă, đe hŏk tro roi 'mĕh hŏk, roi ƀlŏk đunh. Ƀok Phạm Thái Hùng, Phŏ hiê̆u trơng Hnam trưng jăl ƀar Nguyễn Đình Chiểu ăn tơbăt, adrol sơ̆ dôm kơsô̆ chih răk tơ̆ hnam trưng mă lơ 'nŏh chih răk hăm hla ar ngăl dang ei đei chih tơmât lơ̆m kơmăy păng 'măn răk lơ̆m VNPT.   

“Hnam trưng oei tơchĕng hơlen năng hăm đei phần mềm hơyơ đei yoa, reh păng vei răk sơđơ̆ng ‘lơ̆ng ƀiơ̆ ưh păng oei tơchĕng tơdăh răt đei ‘nŏh tơdrong vei lăng hŏk tro chĕp điên thoăi tơ̆ hnam trưng vă pơm ƀai thoi yơ. Yoa tơdrong arih xa kơ đe hŏk tro tơ̆ âu kŭm oei đei lơ pơmat tat, ưh kơsĭ hnam yơ kŭm đei điên thoăi vă ăn kon hơ ‘lơ̆p yoa mưh hŏk pơhrăm ôh. Mă lei tơdăh đei ăn đe oh pơm ƀai lơ̆m kơmăy tĭnh dăh mă điên thoăi ‘nŏh gô tơjur ƀiơ̆ lơ tơdrong pơmat mưh pơtho hŏk pơhrăm”.

Dôm hnam trưng tơ̆ Tiến Thành hơpơi ‘mĕh, vă tơdrong tơplih hăm kơmăy sô̆ gơh đei yoa ‘lơ̆ng ƀiơ̆ tơ̆ yăn âu, anih jang kơpal athei hơnơ̆ng pơgơ̆r pơtho pơhrăm, hơtŏk tơdrong gơ̆h iŏk yoa kơmăy phầm mềm ăn thây kô. Atŭm hăm 'nŏh đei trong tơgŭm hăm dôm phần mềm da ƀiơ̆ huach lơ jên. Găh noh dơ̆ng, tơdrong chih răk kơsô̆ oei xa kơ kon pơlei jăh chih hơmet mă 'lơ̆ng, trŏ ƀlep vă rim hnam trưng gơ̆h chih hơmet 'lơ̆ng hla ar hŏk ƀă hăm kơmăy sô̆.