Anih vei lăng kon pơlei dêh char Lâm Đồng athei anih jang kơpal tơ̆ tơring hơtŏk tơdrong dăr lăng, vei lăng mă ‘lơ̆ng rim anih tĕch đak xăng, đak dâu; tơtom chă ƀôh păng sek tơlang tơpăt dôm tơdrong pơm glăi, răt mong, ôn tơmam glăi hăm tơdrong hơgăt đơ̆ng luơ̆t găh hla ar răt, jơnăr tĕch păng yă tĕch le.

Dôm anih tĕch mơdro tơm păng bơngai pơdro đak xăng, đak dâu athei pơtruh tơmam mă lăp vă huei đei tơdrong kơƀăh tơmam. Dang ei tơdrong tĕch pơtruh đak xăng, đak dâu tơ̆ dêh char Lâm Đồng oei sơđơ̆ng ‘lơ̆ng. Mă lei, tơ̆ hơnăp dôm tơdrong tơplih ưh ê đơ̆ng anih tĕch mơdro lơ̆m apŭng plenh teh, anih jang kơpal kơ dêh char Lâm Đồng oei hơnơ̆ng hơlen năng tôch kơjăp rim tơdrong tơ̆ anih tĕch mơdro, atŭm hăm ‘nŏh tơtă ăn kon pơlei lê̆ răt măn đak xăng, đak dâu lơ̆m hnam dăh mă tơ̆ anih jang vă huei đei tơdrong unh xa, đôh păng vei lăng sơđơ̆ng ‘lơ̆ng tơpôl.