VOV4.Bahnar -Tơ̆ hơ năp kơ sô̆ bơ ngai jĭ Covid-19 lơ̆m dêh char tŏk lơ, ‘năr 24/2, Anih vei lăng kon pơ lei dêh char Lâm Đồng đei hla ar athei rim anih jang kơ pal, anih vei lăng kon pơ lei dôm apŭng, pơ lei tơm lơ̆m dêh char hơ tŏk loi dơ̆ng tơ lĕch jang kơ tang dôm trong jang tang găn jĭ. Lơ̆m 1 puăt khei âu ki, kơ sô̆ bơ ngai jĭ Covid-19 ‘nao tơ̆ Lâm Đồng tŏk lơ hloh 285% hăm hloh 12.000 ‘nu jĭ, hơ tŏk akŏp kơ sô̆ bơ ngai jĭ Covid-19 lơ̆m dêh char tŏk hloh 25.700 ‘nu. Kăl kơ lăng truh, lơ̆m kơ sô̆ dôm bơ ngai jĭ Covid-19 ‘nao đei găh lơ ‘noh hŏk tro păng thây kô pơ tho. Lăp jô̆ đơ̆ng ‘năr 7/2 truh dang ei, kơ sô̆ chih jô̆ tam mă tôm hlôi ăn ƀôh đei tŏ sĕt hloh 1.700 ‘nu hŏk tro păng kơ hrĕng thây kô pơ tho đei băt hơ dăh jĭ Covid-19. Anih vei lăng kon pơ lei dêh char Lâm Đồng athei Anih vei lăng găh pơ tho pơ hrăm Lâm Đồng hơ nơ̆ng dăr hơ len, dăr lăng tơ drong tơ lĕch jang kiơ̆ tơ drong jang tang găn jĭ tơ̆ dôm hnam trưng hŏk, anih pơ tho pơ hrăm lơ̆m tơ ring; sek phak kơ hret dôm bơ ngai ưh kơ pơm kiơ̆ dôm trong jang tang găn jĭ Covid-19 kiơ̆ tơ drong hơ găt. Anih vei lăng kon pơ lei dêh char Lâm Đồng kŭm athei Anih vei lăng găh jang pơ gang Y tế Lâm Đồng tơ lĕch jang ƀet bơ̆ng Covid-19 hrĕnh hloh dơ̆ng, mă loi ‘noh jăh pơ gơ̆r ƀet pơ goh jrŭm 1 păng 2 ăn bơ ngai 12 sơ năm tơ̆ kơ pal păng ƀet jrŭm pơ klăm dơ̆ng ăn bơ ngai đơ̆ng 18 sơ năm tơ̆ kơ pal, jô̆ hloi dôm bơ ngai đơ̆ng tơ ring nai truh. Vei sơ đơ̆ng lơ̆m khei 2/2022 âu đĭ đăng bơ ngai đơ̆ng 12 sơ năm tơ̆ kơ pal adoi đei ƀet bơ̆ng tôm kơ liêu vắc xin.

Thuem: Tơ blơ̆