VOV4.Bahnar - Lăm tŏ sĕt hŏk tro, lơ hnam tỷương iĕ gei hơnơ̆ng lơ̆m tơring, ‘nŏh mĭnh lơ̆m dôm tơdrong tơm pơm ăn dêh char Gia Lai ư̆h kơ măh hlŏh 3.400 ‘nu ƀok thây kô pơtho lơ̆m sơnăm hŏk ‘nao. Lơ̆m mă nŏh, tơdrong akŏm hơgrop lơ̆m lăm, tơmơ̆t jing mĭnhhnam trương tơ̆ tơring au lơ̆m khei năr au ki iung jang hiơ hiơ̆, pơm kơnê̆ trŭh trong jang pơm kơ toei khŭl jang, twodrong pơtho ‘lơ̆ng hơ iă adoi nhen hơmet pơ ‘lơ̆ng ư̆h kơ măh ƀok thây kô:

Tơ̆ tơring Ia Sol (apŭng Phú Thiện): Hnam trương jăl kơđĕh Thắng Lợi (9 lăm) păng Hnam trương Jăl ƀar Trưng Vương (12 lăm), mă lei 4 sơnăm au ki ư̆h kơ đei akŏm jing mĭnh kiơ̆ tơdrong tơchơ̆t

Jĭ tơring đei lơ hnam trương iĕ, mă lei hlŏh 4 sơnăm jang kiơ̆ trong jang hơmet pơ ‘lơ̆ng hnam trương lăm hŏk, apŭng Phú Thiện (Gia Lai) lăp tơ jur đei 3 hnam trương. Yă Nguyễn Thị Hoa - Kơdră chĕp pơgơ̆r Dơnŏ anĭh vei lăng Hnam trương pơtho pơhrăm apŭng Phú Thiện tơbăt, đei lơ tơdrong pơm ăn tơring tim mă jang kiơ̆ hloi tơdrong akŏm hơgrop lăm, tơmơ̆t jing mĭnh kơ rim hnam trương iĕ: “Mă tơpă, lơ̆m khei năr au ‘nŏh jei gơ̆h hơgrop jing mĭnh tơ̆ mĭnh ƀar hơnĭh hnam trương dơ̆ng. Ming man đei hnam trương tơm ‘nŏh gô tơmơ̆t akŏm jing mĭnh, hơmet pơ ‘lơ̆ng tơdrong au rŏ năng trŭh sơnăm 2025 ‘nŏh mă keh đang. Tơdrong jang au jei gơ̆h bu mă ưh, mă lei hơtăih dêh kơna tơdrong chĕp pơgơ̆r jei ư̆h kơ gan ‘lơ̆ng. Găh dôm hnam trương tơ jê̆ lei lơ̆m khei năr kơnh gô pơjing jing mĭnh tơ̆ mĭnh ƀar hnam trương iĕ dơ̆ng. Trŭh au kơnh, rŏ năng gô tơmơ̆t jing mĭnh kiơ̆ jăl hŏk pơhrăm.".

Hơgrop akŏm jing mĭnh lăm, hơgrop akŏm jing mĭnh kơ rim hnam trương iĕ gô tơgop hơmet pơ ‘lơ̆ng tơdrong ư̆h kơ măh ƀok thây kô pơtho tơ̆ Gia Lai

Kiơ̆ đơ̆ng Dơnŏ anĭh vei lăng Hnam trương pơtho pơhrăm păng Dơnŏ anĭh bơ̆ jang Nội vụ Gia Lai dăr lăng hơlen, hrei au tơ̆ rim apŭng Phú Thiện, An Khê, Đức Cơ oei đei lơ hnam trương hŏk jăl kơ đĕh păng Jăl ƀar oei iĕ ioch, tim mă trŭh 10 lăm lơ̆m 1 hnam trương păng tim mă trŭh 20 ‘nu hŏk tro lơ̆m 1 lăm. Tơ̆ rim apŭng Ia Pa, Kbang, Kông Chro, Krông Pa, Chư Păh, Chư Pưh đei trŭh 21 hnam trương mâm non đei tim mă trŭh 5 lăm. Dôm hnam trương au jei kăl tơmơ̆t jing mĭnh kơ yuơ ư̆h kơtôm rơvơn găh kơsô̆ lăm kiơ̆ tơdrong tơchơ̆t đơ̆ng Dơnŏ anĭh tơm vei lăng hnam trương pơtho pơhrăm.

Ư̆h khan lăp jang ư̆h kơ ‘lơ̆ng lơ̆m akŏm jing mĭnh kơ lăm hŏk, kơ hnam trương, khŭl kơdră tơring rim apŭng oei jang tim mă ‘lơ̆ng lơ̆m iung jang hơdoi hăm dơnŏ anĭh vei lăng hnam trương pơtho pơhrăm. Ƀok Lê Duy Định-Kơdră chĕp pơgơ̆r Dơnŏ anĭh vei lăng Hnam trương pơtho pơhrăm dêh char Gia Lai tơbăt:“Nhôn athei akŏm jing mĭnh kơ 6 hnam trương Jăl ƀar đei lăp 15 lăm hŏk tơ̆ rim apŭng Kbang, Đức Cơ, Phú Thiện, Ia Pa, Krông Pa. Nhôn hlôi chĭh pơtrŭh hla bơar athei Dơno anĭh vei lăng kon pơlei rim apŭng au tơroi tơbăt ăn rim hnam trương jăl ƀar vă akŏm jing mĭnh, mă lei tim mă ƀô̆h rim apŭng tơl ăn. Athei rim hơnĭh Đảng rim apŭng jei kăl lăng ba kơ jăp tơdrong au. Tơdăh lăng ba ư̆h tơnăp, tơnap mă jang keh đang tơdrong au.".

Jang kiơ̆ tơdrong akŏm jing mĭnh rim hnam trương pơtho pơhrăm, đơ̆ng sơnăm 2018 truh dang ei, Gia Lai hlôi tơjur 4 hpơnĭh hnam trương thương xuyên păng tơjur đei 83 hnam trương, 515 lăm hŏk, 406 hơnĭh hnam trương iĕ. ‘Ngoăih dôm apŭng, thĭ xăh jang kiơ̆ ‘lơ̆ng, ‘nŏh oei đei lơ tơring jang keh đang tŏ sĕt sot nhen: Thĭ xah Ayun Pa, rim apŭng Phú Thiện, Mang Yang, Đức Cơ, Ia Grai, pơlei tơm Pleiku … kơsô̆ hnam trương iĕ akŏm jing mĭnh lăp tŏ sĕt sot đĕch. Tơdrong mă au yak hơdrơ̆k hăm dôm tơdrong hơdrin akom jing mĭnh lơ lăm hŏk, hnam trương vă hơmet pơ ‘lơ̆ng tơdrong ư̆h kơ măh ƀok thây kô pơtho, pơjing ‘lơ̆ng hơ iă hlŏh dơ̆ng lơ̆m pơtho pơhrăm.  

Hơnơ̆ng tơlĕch jang kiơ̆ Tơdrong tơchơ̆t 19/NQ-TƯ găh tơdrong pơtho pơhrăm, jăl jang 2022-2025, dêh char Gia lai gô tơjur dơ̆ng 8 hơnĭh jang, 17 hnam trương, 97 hơnĭh hnam trương iĕ. Tơdăh jang keh đang tơdrong au, dêh char gô pơkom đei hlŏh 1.700 ƀiên chê̆ ƀok thây kô pơtho. Atŭm hăm kơsô̆ ƀiên chê̆ ‘nao đei Trung ương tơmơ̆t ăn, Gia lai gô xek tơlang keh đang tơdrong ư̆h kơ măh ƀok thây kô pơtho hrei au.

        Tơ̆ hop akŏm kơ Dơnŏ anĭh vei lăng hnam trương pơtho pơhrăm đei pơgơ̆r lơ̆m tok bŏk khei 8/2022, yă Nguyễn Thị Thanh Lịch- Kơ iĕng Kơdră chĕp pơgơ̆r Dơnŏ anĭh vei lăng kon pơlei dêh char Gia Lai athei rim apŭng, thĭ xăh, pơlei tơm kăl jang kiơ̆ mă tơnăp hlŏh dơ̆ng tơdrong hơmet ming rim hnam trương pơtho pơhrăm vă hơmet pơ ‘lơ̆ng tơdrong ư̆h kơ măh ƀok thây kô pơtho, sơđơ̆ng ‘lơ̆ng hơ iă ăn tơdrong hŏk pơhrăm kơ đe hŏk tro:“Hlôi pơjao ăn Dơnŏ anĭh vei lăng Hnam trương pơtho pơhrăm dêh char păng Dơnŏ anih Nội vŭ dăr lăng rim hơnĭh, rim tơring. Hăm dêh char, pă đei trong yơ bơih, kăl jang kiơ̆ hloi vă sơđơ̆ng măh mai ƀok thây kô pơtho. Ĭnh athei rim tơring tĕnh koănh tơlĕch jang hloi. Nhôn gô hơnơ̆ng dăr lăng hơlen găh tơdrong jang kiơ̆ tơdrong au, tơklep hăm hơnăp jang kơ bơngai chĕp kơ̆l".

Bơngai chĭh: Nguyễn Thảo

Tơblơ̆ nơ̆r: Amazưt