VOV4.Bahnar - Năr 11/8, tơ̆ Hơnĭh bơ̆ jang Jơnŭm hơlen Trung ương, Kơdră chĕp pơgơ̆r Tĕh đak Nguyễn Xuân Phúc, Kơdră chĕp pơgơ̆r Dơnŏ anĭh pơrô̆ jang tơ iung pơjing “Tơdrong vă jang Trong jang kăl tơ iung pơjing păng pơm pơkeh Tĕh đak pháp quyền xã hội chủ nghĩa Việt Nam truh sơnăm 2030, lăng trŭh sơnăm 2045” pơm tơm bơ̆ jang hăm Khŭl kơdră Dơnŏ anĭh pơrô̆ jang hăm Jơnŭm Hơlen Trung ương.

Rup bơ̆ jang pơma dơnŭh

Tơ̆ jơ bơ̆ jang, rim kơdră jang lơ̆m Jơnŭm hơlen Trung ương drơ̆ng mĭnh nơ̆r, hôn bơnê kơtang tơdrong hơmet ăn ‘lơ̆ng, gơ̆h hơgei, hơtŏ hơnơ̆ng đơ̆ng Dơnŏ anĭh pơrô̆ jang Tơ iung pơjing Tơdrong vă jang. Mă đơ̆ng oei đei mĭnh ƀar nơ̆r tơgop akhan kăl hơnơ̆ng chă tơchĕng hơlen, tơgoăt iŏk nơ̆r tơgop vă pơm pơkeh mă lei găh lơ trong vă pơjing Tơdrong vă jang hlôi iŏk đei lăp mĭnh ƀơ̆r đon kơtang đơ̆ng păh Jơnŭm hơlen Trung ương, mă kăl ‘nŏh trong hơlen, tơdrong yan au kơ Tơdrong vă jang păng dôm tơdrong kăl hlŏh tơmơ̆t lơ̆m Tơdrong Tơchơ̆t. Lơ nơ̆r tơgop lăp đon hăm dôm nơ̆r tơblang hơdăh păng trong hơmet pơ ‘lơ̆ng đơ̆ng Dơnŏ anĭh pơrô̆ jang găh dôm tơdrong đei nơ̆r tơgop phara dĭh băl. Kơdră chĕp pơgơ̆r Tĕh đak athei Khŭl bơ̆ jang Hơmet ming tơgoăt iok tôm tong nơ̆r tơgop đơ̆ng Jơnŭm Hơlen Trung ương vă hơnơ̆ng tơmơ̆t dơ̆ng, pơm pơkeh Tơdrong vă jang.

Tơblơ̆ nơ̆r: Amazưt