VOV4.Bahnar - Gơ măng 26/3, tơ̆ Hnam hơ ri tih Hà Nội, Trung ương Đoàn Thanh niên Cộng sản Hồ Chí Minh, Anih mong jên tơ gŭm ăn sơ năm mơ lôh rơ gei Việt Nam pơm lêh Hơ păh tơ mam ăn Sơ năm mơ lôh Việt Nam rơ gei sơ năm 2021. Anih pơ gơ̆r rơih păng hơ păh ăn 10 ‘nu sơ năm mơ lôh Việt Nam rơ gei păng 9 ‘nu sơ năm mơ lôh Việt Nam ƀĕnh tơ drong hơ mĕng sơ năm 2021. ‘Nâu jĭ đe druh drăm, đe hơ iŏh rơ gei hăm lơ tơ drong jơ nei ‘lơ̆ng găh hŏk pơ hrăm, tơ chĕng hơ len khoa hŏk, tơ plŏng kơ dâu, bơ̆ jang, vei lăng tĕh đak.

Lơ̆m lêh hơ păh tơ mam, dôm sơ năm mơ lôh Việt Nam rơ gei đei jơ pơ ma nuh, tơ roi ăn bơ ngai lăng 3 tơ drong “Hơ pơi ‘mĕh păng hơ mĕng”, “Yak hlŏh mơ mat tat hŭt hơ kâu bơ̆ jang” păng “Jơ nei đơ̆ng bơ̆ jang plang pơ yơ̆r”. Hăm dôm tơ drong tơ roi tôch hơ iă, đe sơ năm mơ lôh Việt Nam ưh lăp tơ ƀôh jơ dăh jơ hngâm đon gơ̆h hơ gei, đon adrin jang hơ drol lơ̆m rim tơ drong arih xa, tơ pôl đĕch mă oei hơ nơ̆ng adrin tưk tơ iung đon rơ gei vă tơ gop ăn tơ drong jang tŏk păng bơ̆ jang đei tơ drong hơ pơi ‘mĕh tĕh đak pơ drŏng, pran kơ tang.

Dơ̆ng: Tơ blơ̆