VOV4.Bahnar - Gơ măng hei (06/9) tơ̆ Anih pơre nơ̆r tĕh đak 58 Quán Sứ, Hà Nội pơ gơ̆r lêh Hơ păh tơ mam Nơ̆r pơ ma Việt Nam sơ năm 2022. ‘Nâu jĭ tơ drong jang tơ băt 77 sơ năm năr pơ jing Radio nơ̆r pơ ma Việt Nam (7/9/1945 – 7/9/2022).

Kơ dră chĕp kơ̆l Radio nơ̆r pơ ma Việt Nam Đỗ Tiến Sỹ hơ păh yaih A

Ƀât blŭng jơ pơm lêh hơ păh tơ mam Nơ̆r pơ ma Việt Nam, Kơ dră chĕp kơ̆l Radio nơ̆r pơ ma Việt Nam Đỗ Tiến Sỹ pơ ma hơ dăh, kiơ̆ đơ̆ng rim jăl khei ‘năr jang tŏk kơ tĕh đak, Nơ̆r pơ ma Việt Nam ling lang dơ̆ng hơ dai hăm rim bơ ngai, hơ nhăk tơ drong chơt păng đon lui truh. Roi mơ mat tat, roi krê hơ mơt ‘nŏh roi tơ ƀôh đon rơ gei, jang tơ năp đơ̆ng bơ ngai chih hla ar tơ roi ăn Radio nơ̆r pơ ma Việt Nam.

Kơ dră chĕp kơ̆l Radio nơ̆r pơ ma VN pơ ma hơ dăh: Lơ̆m khei ‘năr tơ plih hăm kơ măy sô̆, Radio nơ̆r pơ ma VN roi athei iŏk yoa tơ drong pran ‘lơ̆ng đơ̆ng kơ dih, athei đei đon pơ chĕh rơ gei, kăl loi ‘nŏh chih đei tơ drong kơ tơ̆ng ang hrĕnh, tơ tom, tơ̆ jơ̆p jang tơ ring. Đơ̆ng rŏng 1 sơ năm tơ lĕch păng châm hơ len, Anih pơ gơ̆r rơih Hơ păh tơ mam Nơ̆r pơ ma Việt Nam sơ năm 2022 đei 5 yaih A, 9 yaih B păng 11 yaih C ăn 4 kơ loăi chih. Lơ̆m nŏh, dôm ƀai chih “Kŏh phă bri ‘long tĕh đak kư̆ kă vă pơm trong Trường Sơn Đông” đơ̆ng Anih Radio nơ̆r pơ ma Việt Nam tơ̆ tơ ring Tây Nguyên iŏk đei yaih A ăn ƀai chih tơ roi lơ̆m radio.

Dơ̆ng: Tơ blơ̆