VOV4.Bahnar - ‘Năr (26/05), Anih pơ gơ̆r jang kơ teh đak găh tang găn tŏ ‘mi kial jang hơ dai hăm Anih tơm vei lăng găh tơ drong kơ tơ̆ng ang păng tơ roi tơ băt, Khŭl chih hla ar tơ roi Việt Nam pơ gơ̆r Lêh pơ jao hơ păh tơ mam pơ long chih kơ tơ̆ng ang kơ teh đak găh tang găn tŏ ‘mi kial pơ răm ‘măng mă 2. Hăm hơ năn “ Yua kơ 1 tơ pôl sơ đơ̆ng tơ̆ hơ năp tŏ ‘mi kial - kơ chăng pơm lăp hăm tơ plih tŏ ‘mi kial”, Pơ long chih kơ tơ̆ng ang kơ teh đak găh tang găn tŏ ‘mi kial pơ răm ‘măng mă 2 hlôi sơng đei  tơ drong vang pơ long đơ̆ng lơ anih jang chih kơ tơ̆ng ang păng khŭl bơ ngai chih tơ roi, chih hơ met ming đơ̆ng dôm anih jang chih kơ tơ̆ng ang Trung ương păng tơ ring. Đơ̆ng hloh 900 ƀai chih tơ̆ 5 kơ loăi hla ar chih kơ tơ̆ng ang, Khŭl pơ gơ̆r hlôi rơ̆ih đei 35 ƀai chih hơ gei hloh vă pơ jao hơ păh tơ mam tơ̆ jơ pơm lêh ‘noh: 4 jơ nei mă mônh, 5 jơ nei mă 2, 10 jơ nei mă 3, 15 jơ nei pơ chhơp jơ hngơ̆m păng 1 jơ nei “ Tơ drong tơ roi ƀơm truh pran kơ tang hloh”.

Thuem: Tơ blơ̆