VOV4.Bahnar - Đơ̆ng rŏng 3 năr pơ gơ̆r hăm lơ tơ drong tôch hơ iă “Lêh Sầu riêng Krông Pach ‘măng mă 1 – 2022” hlôi tôch lơ̆m gơ măng 3/9. Pơ gơ̆r đơ̆ng ‘năr 1/9 truh ‘năr 3/9, tơ drong lêh sơng đei dang 40 rơ bâu ‘nu tơ moi truh hăm apŭng Krông Pach.

Lêh pơ tôch năr sầu riêng

15 tơ drong jang tơm lơ̆m năr lêh tơ tă hơ iă ngăl, pơm lăp đon bơ ngai chă tơ mang lăng. Lơ̆m nŏh, Kơ chơ roi tơ ƀôh dôm tơ mam đơ̆ng choh jang xa đei, hăm 200 kơ deng tơ mam đơ̆ng dôm anih tĕch mơ dro, HTX, pơm tơ lĕch, tĕch mơ dro tơ mam tơ̆ tĕh đak đe lơ̆m păng ‘ngoăih kơ dêh char sơng đei hlŏh 10 rơ bâu ‘nu bơ ngai truh lăng.

“Hop akŏm tơ lĕch trong krao hơ vơn tơ mât jên jang păng atŏk tơ iung tơ mam đơ̆ng choh jang xa kơ jăp ‘lơ̆ng apŭng Krông Pach – sơ năm 2022”, Dơ nŏ anih vei lăng kon pơ lei pŭng Krông Pach hlôi kĭ hla ar pơ kăp hăm anih tĕch mơ dro chih măt tơ mât jên jang ăn 24 tơ drong jang găh chă tơ mang lăng, pơ tho pơ hrăm, pơm trong, man anih jang, pơ jing tơ ring jang kơ măy, pơm tơ lĕch tơ mam đơ̆ng choh jang xa hăm hlŏh 11.000 ti hlak jên vă jang.      

Dơ̆ng: Tơ blơ̆