Hơ nơ̆ng bơ̆ jang lơ̆m ‘măng năm hơ pong tơ̆ Việt Nam, gơ măng hei 1/11, Kon ƀok pơ tao Đan Mạch Frederik păng hơ kăn ƀok Mary Elizabeth truh pơm lêh tơ băt 50 sơ năm pơ jing tơ drong pơ vei jang tơ bôl Việt Nam – Đan Mạch. Vang pơm lêh đei Phŏ Kơ dră tĕh đak Võ Thị Ánh Xuân kŭm hăm bơ ngai tang măt dôm Anih tơm, anih jang kơ pal, tơ ring tơ rang păng anih tĕch mơ dro đơ̆ng 2 păh.

Phŏ Kơ dră tĕh đak Võ Thị Ánh Xuân pơ ma lơ̆m jơ pơm lêh

Pơ ma lơ̆m jơ pơm lêh, Phŏ Kơ dră tĕh đak Võ Thị Ánh Xuân pơ ma hơ dăh Việt Nam păng Đan Mạch hlôi pơ jing tơ drong pơ vei jang tơ bôl lơ̆m sơ năm 1971, pơ jing hơ yak blŭng a lơ̆m tơ drong tơ iung pơ jing trong jang hơ doi 2 pang. Iŏk đơ̆ng nŏh, Đan Mạch jĭ mĭnh lơ̆m dôm tĕh đak tơ gŭm 2 pang gĭt kăl hlŏh hăm Việt Nam, tơ gop ‘lơ̆ng ăn tơ drong jang tŏk mŭk drăm, tơ pôl kơ tĕh đak Việt Nam hrei ‘nâu.

Yak hlŏh 50 sơ năm jang tŏk, tơ drong pơ vei 2 tĕh đak tơ plih đơ̆ng pơ vei jang hơ doi ‘lơ̆ng đơ̆ng sơ̆ jing tơ drong pơ vei jang hơ doi hơ tŏ băl, 2 păh đei yoa ngăl păng hlôi pơ jing tơ drong Pơ vei jang hơ doi tôm tơ drong lơ̆m sơ năm 2013. Kiơ̆ Kon ƀok pơ tao, Đan Mạch oei jing tĕh đak tĕch mơ dro, tơ mât jên jang gĭt kăl hăm Việt Nam păng vă hơ nơ̆ng yak hơ doi đei yoa, lui băl hăm Việt Nam lơ̆m dôm tơ drong jang hơ doi găh cham char, choh jang xa, jang pơ gang, păng pơ tho pơ hrăm.