VOV4.Bahnar - Pơ gê (25/8), tơ̆ plt Thanh Hoá, hăm jơ hngâm chơt hơ iă, ƀĕnh tơ drong ‘mêm băt băl đơ̆ng Sơ năm tơ guăt ƀơ̆r đon, jang tơ bôl Việt Nam-Lào, Lào-Việt Nam sơ năm 2022, dêh char Thanh Hóa pơ gơ̆r lêh tih tơ băt 60 sơ năm năr pơ jing tơ drong pơ vei, jang tơ bôl Việt Nam-Lào, 45 sơ năm năr Kĭ hla ar pơm tơ bôl păng jang hơ doi Việt Nam-Lào, 55 sơ năm năr kĭ jang hơ doi ‘lơ̆ng hơ iă Thanh Hóa - Hủa Phăn. 

Tơ drong hơ ri hơ xoang lơ̆m jơ pơm lêh

Vang truh pơm lêh đei lơ kơ dră chĕp kơ̆l, anih jang tơ bôl kơ 2 tĕh đak Việt Nam- Lào; kơ dră chĕp kơ̆l dang ei, kơ dră chĕp kơ̆l adrol sơ̆ kơ 2 dêh char Thanh Hoá (Việt Nam) păng dêh char Hủa Phăn (tĕh đak Cộng hòa Dân chủ Nhân dân Lào), kŭm hăm lơ kăn ƀô̆, đảng viên, kon pơ lei, bơ ngai jang kơ tĕh đak, khul linh tơ blăh, đe hŏk tro.

Pơ ma lơ̆m jơ pơm lêh tơ băt, ƀok Đỗ Trọng Hưng, Bí thư đảng dêh char Thanh Hoá pơ ma hơ dăh: Việt Nam păng Lào jĭ 2 tĕh đak jê̆ băl, kông tơ til kông, đak krong tơ til đak krong, vang nhă hơ dai 1 đak krong Mê-kông, vang gơn hơ dai hơ bon kông Trường Sơn čhing kơ jung, kon pơ lei 2 tĕh đak đei tơ drong juăt vă lei lăi băl, ƀĕnh jơ hngâm đon ‘mêm kơ eng, pơ vei băl tôch ‘lơ̆ng, hlôi pơ jing đei tơ drong pơ vei mât 1 ƀơ̆r đon kơ jăp ‘lơ̆ng truh ning mônh.

Dơ̆ng: Tơ blơ̆