VOV4.Bahnar - Pơ gê ‘năr 12/10 truh, tơ̆ Hà Nội gô pơ gơ̆r Lêh tơ băt Năr bơ ngai jang mơ dro sa Việt Nam (13/10) păng pôk pơ ư “ Bơ ngai jang mơ dro sa hơ gei” sơ năm 2022. ‘Nâu jĭ kơ tơ̆ng ang đei tơ lĕch tơ̆ jơ hop akŏm tơ roi tơ băt hăm khŭl chih kơ tơ̆ng ang pơ gê ‘năr 6/10 đơ̆ng Khŭl jang vei lăng mơ dro sa păng kơ măy kơ mŏk Việt Nam (VCCI). Tơ̆ hop akŏm tơ roi tơ băt hăm khŭl chih kơ tơ̆ng ang, Kơ dră VCCI Phạm Tấn Công tơ băt hơ dăh dôm tơ drong jang ‘lơ̆ng hơ dăh kơ kuh chơt hơ iă Năr bơ ngai jang mơ dro sa Việt Nam 13/10 sơ năm ‘nâu. Lơ̆m noh, kăl kơ lăng truh đei 2 tơ drong jang gĭt kăl ‘noh jĭ Hop akŏm khoa hŏk “ Jơ hngơ̆m đon ‘lơ̆ng bơ ngai jang mơ dro sa păng tĕch mơ dro ‘lơ̆ng hơ iă Việt Nam lơ̆m tơ drong ‘nao” păng Lêh tơ băt Năr bơ ngai jang mơ dro sa păng pôk pơ ư “ Bơ ngai jang mơ dro sa Việt Nam hơ gei” sơ năm 2022. 

Kơ dră VCCI Phạm Tấn Công pơ gơ̆r hop akŏm

Khŭl pơ gơ̆r jang tơ̆ jơ hop akŏm tơ roi tơ băt hăm khŭl chih kơ tơ̆ng ang kŭm tơ băt găh “ tơ ƀôh băt” ‘nao đơ̆ng Bơ ngai jang mơ dro sa Việt Nam hơ gei âu. Kiơ̆ kơ ‘noh, tơ ƀôh băt đei 6 păh tơ ƀôh băt ăn kơ 6 tơ drong pơ kăp ‘lơ̆ng jơ hngơ̆m đon bơ ngai jang mơ dro sa Việt Nam yua đơ̆ng VCCI tơ băt hơ dăh: Pơm đei kơ jă kăp gĭt mŭk drăm ăn tơ pôl; Pơm kiơ̆ khôi luơ̆t’ Rơ đăh, hơ tŏ băl, tơ păt; Pơ cheh, jang hơ dai, vang hơ tŏk tơ iung hăm tơ pôl păng ŭnh hnam.

VOV/Thuem tơ blơ̆