VOV4.Bahnar - Năr ‘nâu (19/8) tơ̆ Hà Nội, Anih tơm vei lăng găh choh jang sa păng hơ tŏk tơ iung tơ ring tơ rang jang hơ dai hăm Anih tơm vei lăng găh tơ drong kơ tơ̆ng ang păng tơ roi tơ băt pơ gơ̆r tơ lĕch jang “ Tơ plih kơ sô̆ Choh jang sa păng Hơ tŏk tơ iung tơ ring tơ rang” păng tơ băt hơ dăh tơ lĕch jang Kơ măy kơ tơ̆ng ang păng hơ nih chih răk kăl, vei lăng kơ sô̆ tơ ring pơ tăm. Kiơ̆ jô̆ pơ hlom, lơ̆m teh đak dang ei đei 4,8 triệu hek tar teh ‘long pơ tăm ‘noh: ‘long sa plei, pơ tăm ƀa păng ‘long kăp gĭt. Lơ̆m noh, lơ tơ ring hlôi đei asong kơ sô̆ hơ năn vă vei lăng tơ drong pơm tơ lĕch, tơ chă băt tơm a, hơ tŏk ‘lơ̆ng tơ mam đơ̆ng choh jang sa, nhen: ƀa phe tơ̆ tơ ring tơ măn đak krong Cửu Long; cheh phe, gui tơ̆ tơ ring Tây Nguyên; plei gu ga tơ̆ Bình Thuận; plei nhang, vải thiều tơ̆ dôm dêh char Hải Dương, Bắc Giang, Hưng Yên, Sơn La… Mă lei, kiơ̆ kơ lăng ƀôh, tơ drong pơm tơ lĕch oei iĕ le tam mă tơ goăt tôm tơ drong kơ tơ̆ng ang đơ̆ng pơm tơ lĕch păng tĕch mơ dro... Tơ pă yan âu ‘nâu athei tŭn pran tơ drong tơ plih kơ sô̆ lơ̆m tơ drong jang choh pơ tăm vă hơ tŏk ‘lơ̆ng iŏk yua đơ̆ng pơm tơ lĕch, tĕch mơ dro păng bơ ngai răt yua.

Thuem: Tơ blơ̆