VOV4.Bahnar - Yak truh tơ băt 75 sơ năm Năr linh jĭ rơ ka linh lôch dŏng teh đak (27/7/1947-27/7/2022), ƀô̆ đô̆i vei lăng tơ ring sơ lam Dak Lak pơ gơ̆r tơ lĕch jang pơ jei băl  “ Nhă đak ƀlŏk kơ tu” ƀlŏk hơ dơ̆r kơ bơ ngai đei kŏng hăm kach mang”. Kŭm hăm jang đang ‘lơ̆ng hơ năp jang đei pơ jao, rim anih jang lơ̆m khŭl linh vei lăng tơ ring sơ lam Dak lak tŭn pran tơ drong jang pơ tho pơ hrăm, tơ roi tơ băt găh tơ drong joăt “ Nhă đak ƀlŏk kơ tu”, “Băt bơ nê”"; hơ drin, kơ chăng kơ dih hŏk pơ hrăm păng pơm kiơ̆ jơ hngơ̆m đon ‘lơ̆ng Hồ Chí Minh, ‘măng krao hơ vơn “ Hơ tŏk tơ drong joăt joe, plang đon hơ gei, tơ găl hăm hơ năn ƀô̆ đô̆i ƀok Hồ” khei ‘năr hle.

Jơ pơm lêh kĭ pơ kăp tơ lĕch jang tơ drong băt bơ nê

Hăm tơ drong jang tơ gŭm, pơ jei băl bơ̆ jang kiơ̆ tơ drong tơ gŭm đe linh jĭ rơ ka, linh jĭ jăn, ŭnh hnam teh đak tơ gŭm; krao hơ vơn kang ƀô̆, khŭl linh vang jang tơ gop jên mong “ Băt bơ nê”; bơ̆ jang kiơ̆ ‘lơ̆ng tơ drong jang man asong “ Hnam ‘mêm mơ nat”, “ Hnam buăl joăt”, “ Hnam 100 hlak jên”; pơ gơ̆r rong ‘me, vei lăng, năm ngôi, pơ lung Mĕ Việt Nam nuih mơng; asong tơ mam, asong hla ar ‘mơ ‘met jên hăm ŭnh hnam linh lôch dŏng teh đak, ŭnh hnam teh đak tơ gŭm đei tơ drong arih sa mơ mat tat.

Thuem: Tơ blơ̆