VOV4.Bahnar -  Lăng trŭh Pơm lêh Kơdră tang măt lơ̆m tĕh đak ‘măng mă 12 kơ Đoàn Hơdrŭh tơdăm Kŏng san Hồ Chí Minh khei năr au ki, Ban Bí thư Trung ương Đoàn hlôi pơgơ̆r lơ tơdrong jang tôch ‘lơ̆ng hơ iă. Lơ̆m au, đei rim ‘măng pơlong chĭh pơchĕh rup tơbăt (lô gô), ƀai hơri tơm kơ pơm lêh hop akŏm păng chhơ̆ rup pơrô̆ pơrôp tơbăt ăn Pơm lêh hop akom Đoàn lơ̆m tĕh đak ‘măng mă 12.

Ƀai hơri "Sứ mệnh thanh niên" ‘nau ƀai hơri tơm kơ Pơm lêh Hop akŏm Đoàn lơ̆m tĕh đak ‘măng mă 12

‘Măng pơlong chĭh pơchĕh tơbăt ăn Pơm lêh hop akŏm Đoàn lơ̆m tĕh đak ‘măng mă 12 hơvơn đei hlŏh 200 ‘nu bơngai chĭh pơchĕh hăm đei 368 tơmam pơchĕh pơtrŭh ăn vang pơlong. Kiơ̆ tơdrong athei, rim tơmam vang năm pơlong tơbăt hơdăh tơdrong kăl kơ Pơm lêh hop akŏm Đoàn lơ̆m tĕh đak; tơbăt hơdăh jơhngơ̆m đon ‘lơ̆ng kơ hơdrŭh tơdăm ‘nŏh hơpơi ‘mĕh vă, pơm jŭk yŭk trong hơlau, hơdrin, nuih mơng, tơgoăt tơgoăl, tơchăr hơgei, atŏk tơ iung; Tơbăt hơdăh găh tơdrong đei iung jing păng atŏk tơ iung kơ Đoàn Hơdrŭh tơdăm Kŏng san Hồ Chí Minh. Khŭl chĕp pơgơ̆r hlôi rơ̆ih iŏk pôk ăn 1 tơmam hơpăh dơ̆ng hơlau, 1 tơmam hơpăh dơ̆ng mă 2, 1 tơmam hơpăh dơ̆ng mă 3 păng 4 tơmam hơpăh pơchhơp jơhngơ̆m ăn rim tơdrong chĭh pơchĕh ‘lơ̆ng hơ iă. Lơ̆m au, tơmam iok đei pôk hơpăh dơ̆ng mă Blŭng pôk ăn tơmam hơpăh găh bơngai chĭh pơchĕh Vũ Hồng Quân, oei tơ̆ Hà Nội. Tơmam hơpăh dơ̆ng mă blŭng đei Khŭl chơ̆m điêm hơlen tôch kơ hơ iă, ‘lơ̆ng, gơ̆h pơm phù hiệu hơtol tơ̆ kơtơ̆h, gơ̆h pơm tơlĕch hăm lơ tơmam drăm. Bơngai chĭh pơchĕh Vũ Hồng Quân, bơngai iŏk đei tơmam hơpăh dơ̆ng mă Blŭng pơma:“Tơdrong tơbăt ăn đơ̆ng ĭnh ba iŏk đơ̆ng rup pơnăr xem vă tơbăt hăm tơdrong hơpơi ‘mĕh vă atŏk tơ iung kơ đoàn hơdrŭh tơdăm, adoi nhen jơhngơ̆m đon hơdrin, kơrŭn đĭ jơhngơ̆m đơ̆ng hơdrŭh tơdăm năm iung jang tơ̆ rim tơring tơrang kơ Tĕh đak. Tơchĕng ‘măng mă blŭng vă ,pơjing tơmam au ‘nŏh kơmau jơk kơ đoàn hơdrŭh tơdăm, kơmau hơpơi ‘mĕh vă kơtang, ‘nau jei jing kơmau kơ jơhnơr mơlôh, tơbăt hơdăh ăn tơdrong ‘lơ̆ng rŏ hơbŏ nhen kơ hơdrŭh tơdăm kơna ba iŏk yua kơmau jơk ‘nŏh tơm hlŏh ăn kơ logo au”.

Logo Pơm lêh hop akŏm Đoàn ‘măng mă 12

Kiơ̆ đơ̆ng Bí thư Trung ương Đoàn Hơdrŭh tơdăm Kŏng san Hồ Chí Minh Nguyễn Tường Lâm: Logo iŏk đei tơmam hơpăh dơ̆ng mă Blŭng gô jing tơdrong pơm kơnăl ăn Pơm lêh hop akŏm Đoàn lơ̆m tĕh đak ‘măng mă 12 păng đei tơƀô̆h tơbăt hơdăh lơ̆m brŏ, lơ̆m tivi, hla bơar kơtơ̆ng ang păng lơ̆m kmăi kmŏk kơsô̆ đơ̆ng năr au hloi:“Logo au đei iŏk yua prăt jơ ‘năr pơgơ̆r Pơm lêh hop akŏm păng đơ̆ng rŏng hop akŏm au hloi. Nhôn jei tơlĕch lơ tơdrong jang atŏk kơtang tơƀô̆h tơbăt găh logo vă rim đoàn viên băt hơdăh găh tơmam drăm mă nhôn rơ̆ih iŏk au. ‘Ngoăih tơplĭh logo pơm lêh hop akŏm Đoàn joăt joe au ‘nŏh gô jing logo pơm lêh Hop akŏm Đoàn lơ̆m tĕh đak păng đơ̆ng rŏng ‘nŏh dơ̆ng prăt lơ̆m jăl jang 12 au kơnh rŏ năng logo ‘nau gô hơnơ̆ng iŏk yua lơ̆m lơ tơdrong pơgơ̆r kơ Đoàn”.

            ‘Nao au, Ban Bí thư Trung ương Đoàn Hơdrŭh tơdăm Kŏng san Hồ Chí Minh jei hlôi tơbăt hơdăh ƀai hơri tơm kơ Pơm lêh Hop akŏm Đoàn lơ̆m tĕh đak ‘măng mă 12. Adoi, pôk hơpăh păng iŏk yua pơ đĭ 11 ƀai hơri hlôi iŏk đei tơmam hơpăh A păng pôk ăn Hla bơar hôn bơnê păng hla bơar drơ̆ng nơ̆r ăn bơngai chĭh pơchĕh 29 ƀai hơri iŏk đei tơmam hơpăh B. Kiơ̆ kơ ‘nŏh, ƀai hơri “Sứ mệnh thanh niên” ‘nau jing ƀai hơri đei Jơnŭm hơlen jŏh hơri pơtrŭh ăn păng Ban Bí thư Trung ương đoàn hlôi drơ̆ng nơ̆r rơ̆ih iŏk jing ƀai hơri tơm kơ Pơm lêh Hop akŏm Đoàn lơ̆m tĕh đak ‘măng mă 12. Ƀai hơri au kơ yuơ Quản Văn Hải chĭh nơ̆r, Quang Huy chĭh pơchĕh tơdra la boa tôch ‘lơ̆ng rŏ hơbŏ nhen. Bơngai chĭh pơchĕh tơdrong hơri Quang Huy tang măt ăn khŭl chĭh pơchĕh tơbăt: Mă đơ̆ng bơngai chĭh nơ̆r ‘nŏh ư̆h khan mĭnh ‘nu bơngai joăt chĭh pơchĕh nơ̆r pơđơ̆k, mă lei hăm mĭnh ‘nu bơngai jang đoàn đunh sơnăm, bơngai chĭh pơchĕh tơdrong hơri lui đei ƀai pơđơ̆k hơ iă vă pơm jing ƀai hơri:“Ba hlôi hưch hanh hơmanh bơnê kơ hơdrŭh tơdăm kŏng san Hồ Chí Minh hăm tơdrong hơri hơbôn, đơ̆ng blŭng ƀai hơri tôch rơbôn hơ iă păng đơ̆ng rŏng ‘nŏh tơbăt ăn jơhngơ̆m đon pran kơtang lơ̆m chăl hle”.

Khul chĕp pơgơr sơng iŏk đei 131 ƀai hơri đơ̆ng 126 ‘nu bơngai joăt chĭh pơchĕh păng ư̆h kơ joăt đơ̆ng 43 tơring lơ̆m tĕh đak bơ̆n. ‘Nau dôm ƀai hơri ‘nao pơchĭh pơchĕh, tôch trŏ lăp lơ̆m yan au păng tơklep hăm dôm tơdrong jang kơ Đoàn păng tơdrong jang kơ hơdrŭh tơdăm păh kơchong đe hơ iŏh lơ̆m chăl hrei au. Lơ̆m pơgơ̆r, khŭl chĕp pơgơ̆r jei pôk ăn tơmam hơpăh A păng tơmam hơpăh B ăn rim bơngai chih pơchĕh 40 ƀai hơri. Bơngai chĭh pơchĕh ƀai hơri Doãn Nguyên, jĭ bơngai jang lơ̆m Khŭl hơlen tơdrong jŏh hơri pơma: Rim ƀai hơri pơtrŭh vang pơlong ‘măng mă au jei hôn bơnê hơnăp jang, hơnĭh dơ̆ng kơ Đoàn Hơdrŭh tơdăm kŏng san Hồ Chí Minh lơ̆m khul hơdrŭh tơdăm đe hơ iŏh păng tơpôl; atŏk kơtang hôn bơnê jơhngơ̆m đon tơgoăt tơgoăl, pơm jŭk yuk trong hơlau, năm iung jang đơ̆ng rim jơhnơr hơdrŭh tơdăm lơm tơ iung pơjing păng vei lăng Tĕh đak: “Nơ̆r tơbăt ăn lơ̆m ƀai hơri ‘nŏh jĭ tôch hơdăh, jing jơhngơ̆m đon iung yak kơ rim jơhnơr hơdrŭh tơdăm hrei au, hơnăp jang hăm tĕh đak jĭ tôch hơdăh,lăp lơ̆m 4-5 pơnĭt jơ kơna nơ̆r hơri jĭ hơlen tôch kơ brĕ. ‘Nau jing trong ‘lơ̆ng kơ ‘măng pơrô̆ pơrôp ‘măng mă au”.  

        Đơ̆ng rŏng pơm lêh tơbăt hơdăh păng pôk ăn tơmam hơpăh ‘măng pơlong, Khŭl chĕp pơgơ̆r tơlech ‘măng pơlong “Tơdra hơri hơdrŭh tơdăm”, chă krao hơvơn rim bơngai hơri hiôk chă hơri ƀai hơri tơm kơ Pơm lêh hop akŏm, pơjing đei trong ‘lơ̆ng ăn kơkŭh chơt hơ iă Pơm lêh hop akoưm Đoàn lơ̆m tĕh đak ‘măng mă 12 lơ̆m rim tơdrong pơgơ̆r lơ̆m mạng tơpôl.

Atŭm hăm ‘nŏh, khei năr au ki, Trung ương Đoàn Hơdrŭh tơdăm kŏng san Hồ Chí Minh pơgơr ‘măng pơlong chĭh pơchĕh rup pơrô̆ pơrôp, tơƀô̆h tơbăt Pơm lêh Hop akŏm Đoàn lơ̆m tĕh đak ‘măng mă 12. Rim rup chĭh pơchĕh đei ‘moi kiơ̆ trong pơgơ̆r kơ Pơm lêh hop akŏm kơdră tang măt lơ̆m tĕh đak Đoàn Hơdrŭh tơdăm kŏng san Hồ Chí Minh ‘măng mă 12 nhen: tơdrong gĭt kăl kơ Pơm lêh hop akŏm lơ̆m tĕh đak; tơƀô̆h hơdăh tơdrong ‘lơ̆ng hơ iă bơ̆ jang tơnăp kơ hơdrŭh tơdăm; trong vă jang, tơdrong jang kơ hơnĭh bơ̆ jang Đoàn păng hơdrŭh tơdăm Việt Nam lơ̆m chăl gơ̆h hơgei hrei au; chăl sơnăm tơ iung pơjing păng atŏk tơ iung kơ Đoàn Hơdrŭh tơdăm kŏng san Hồ Chí Minh; găh hơnĭh dơ̆ng, hơnăp jang păng dôm tơdrong tơgop đơ̆ng Đoàn Hơdrŭh tơdăm Kŏng san Hồ Chí Minh păng khŭl mơlô̆h lơ̆m tĕh đak lơ̆m tơ iung pơjing păng vei lăng Tĕh đak.

VOV Tây Nguyên chĭh

Tơblơ̆ nơ̆r: Amazưt