VOV4.Bahnar - Ƀlep ƀơ̆t tơ băt 92 sơ năm Năr pơ jing Khŭl drŏ kăn Việt Nam, gơ măng ‘năr 18/10, tơ̆ Hà Nội, Khŭl drŏ kăn Việt Nam pơ gơ̆r tơ drong joh ayŏ kơ dŏ soang “ Tơ drong ‘lơ̆ng hơ iă ao tai Việt”. Vang truh akŏm đei Phŏ Kơ dră teh đak sơ̆ yă Đặng Thị Ngọc Thịnh. Tơ̆ jơ pơ gơ̆r, dôm bơ ngai joh hơ ri Hnam hơ ri, pơm tông Việt Nam hơ dai hăm hrŭk pơ rŏ ao tai đơ̆ng bơ ngai pơm chơ choh Đỗ Trịnh Hoài Nam păng dôm Bơ ngai pơm chơ choh ao tai drŏ kăn kiơ̆ 3 hơ năn: Tơm a - Hà Nội sơ̆; tơ drong ‘lơ̆ng hơ iă păng Mơ̆t jang hơ dai.

Hrŭk pơ rŏ ao tai tơ̆ jơ pơ gơ̆r joh hơ ri hơ soang

‘Nâu jĭ tơ drong akŏm dôm ƀai hơ ri hơ soang, pơm tông ‘lơ̆ng hơ iă pôk pơ ư um rup bơ ngai drŏ kăn Việt Nam păng dôm ‘măng hrŭk pơ rŏ ao tai tơ ƀôh tơ drong ‘lơ̆ng hơ iă păng hưch hanh hăm ao tai. Tơ drong hơ ri hơ soang âu vă tơ iung tơ drong ‘mêm, tơ drong chhôk ‘nă păng hơ năp jang vei răk, tơ ƀăk mong kơ jă kăp gĭt ao tai păng roi tơ ƀôh um rup ao tai, kon bơ ngai Việt Nam truh hăm lơ lap kon pơ lei păng bôl buăl apŭng plĕnh teh.

‘Năr 18/10, Khul drŏ kăn dêh char Kon Tum pơ gơ̆r lơ tơ drong jang tôch hơ iă vă tơ băt 92 sơ năm Năr pơ jing Khul drŏ kăn Việt Nam. Hơ iă hlŏh jĭ tơ drong jang Mĕ hơ đơ̆ng- Tơ guăt jơ hngâm ‘mêm băl; Pơ ma đam hơ tŏ hơ nơ̆ng đơ̆ng drŏ kăn hăm drŏ nglo; Năr drŏ kăn iung jang xa sơ năm 2022 păng Pơ tôch tơ drong thi drŏ kăn iung jang xa; pơ ma đam găh Trong tơ gŭm păng tơ lĕch tơ drong pơ jei băl "Pơ jing um ai drŏ kăn Việt Nam lơ̆m chăl ‘nao".

Kơ dră vei lăng Khul drŏ kăn dêh char Kon Tum hơ păh tơ mam ăn đe mĕ hơ đơ̆ng păng hơ iŏh pơ ti 

Hơ drô̆ tơ drong jang Mĕ hơ đơ̆ng- Tơ guăt jơ hngâm ‘mêm băl, rim khul grŭp vang krao hơ vơn tơ gŭm ăn đe hơ iŏh pơ ti đei tơ drong arih xa mơ mat tat dêh hlŏh hăm kơ sô̆ jên hlŏh 2 ti. Ƀlep ƀât ‘măng mă âu, Khul drŏ kăn dêh char Kon Tum hơ păh tơ mam ăn 10/23 đon pơ chĕh rơ gei lơ̆m tơ drong iung jang xa, tĕch mơ dro đơ̆ng 2021-2025; Pơ kăp tơ gŭm 22 đon pơ chĕh rơ gei găh iung jang xa đơ̆ng đe mŏ ŏh, hăm kơ sô̆ jên đei tŏk iŏk đơ̆ng Anih mong jên tơ gŭm tơ pôl, akŏm đĭ đăng jên đei tŏk iŏk loi 5 ti.

VOV Tây Nguyên/Thuem-Dơ̆ng tơ blơ̆