VOV4.Bahnar - Pơ gơ̆r pơ gê 7/7, tơ̆ plt Kon Tum păng vă pơ gơ̆r lơ̆m 2 năr, Hop akŏm mă 3, Jơ nŭm pơ gơ̆r kon pơ lei dêh char Kon Tum jăl XII hăm lơ tơ drong tơ tŏ đei bơ ngai tăh hla lơ̆m dêh char tôch tơ rĕk, đei dôm bơ ngai tang măt pơ ma nuh, apinh jet păng tơ chơ̆t dôm tơ drong găh hơ năp jang kơ dih. Tơ roi hrĕnh găh mŭk drăm tơ pôl 6 khei blŭng sơ năm đơ̆ng Dơ nŏ anih vei lăng kon pơ lei dêh char Kon Tum tơ̆ hop akŏm ăn ƀôh, mă đơ̆ng tơ mam drăm jang đei lơ̆m dêh char tŏk 9,69%, lơ hlŏh kơ sô̆ jang tŏk khei âu sơ năm sơ̆, mă lei lơ tơ drong hơ găt tơm jang ưh đei lăp hăm tơ drong hơ mĕng... 

Dôm bơ ngai tang măt vang Hop akŏm mă 3, Jơ nŭm pơ gơ̆r kon pơ lei dêh char Kon Tum jăl XII

Kŭm hăm ‘nŏh oei đei lơ tơ drong tam mă pran ‘lơ̆ng tam đei sek tơ lang tơ tom jing găn trong tơ drong jang tŏk, nhen: choh jang xa oei đei iŏk yoa tŏ sĕt; pơ rang jĭ phă đei ƀôh tơ̆ ‘long Sâm Ngọc Linh pơm hiong răm lơ ăn unh hnam kon pơ lei; tơ drong hơ met ming trong pơm hla ar, hơ met pơ ‘lơ̆ng anih tơ mât jên jang, tĕch mơ dro, hơ tŏk kơ sư̆k pơ jei đơ̆ng dêh char oei tam mă pran ‘lơ̆ng… Kơ tă lơ̆m nơ̆r pơ ma ƀât blŭng hop akŏm, ƀok Dương Văn Trang, Kơ dră jang lơ̆m Trung ương Đảng, Bí thư đảng dêh char, Kơ dră Jơ nŭm pơ gơ̆r kon pơ lei dêh char Kon Tum athei dôm bơ ngai tang măt akŏm đon rơ gei, tơ lĕch trong jang vă găn đĭ dôm tơ drong tam mă pran ‘lơ̆ng đơ̆ng ki.

Tơ̆ hop akŏm mă 3, Jơ nŭm pơ gơ̆r kon pơ lei dêh char Kon Tum jăl XII, bơ ngai tăh hla dêh char Kon Tum hơ mĕng khul kơ dră tơ ring, dôm anih jang kơ pal đei nơ̆r tơl mă tơ găl hăm lơ tơ drong tơ tŏ lơ̆m jơ apinh jet - Tơl nơ̆r apinh jet, nhen: tơ drong tĕh dơ drŏ tơ̆ apŭng Kon Plông; tơ drong ưh kơ măh tĕh oei, tĕh choh jang xa kơ kon pơ lei tơ̆ tơ ring đei tĕh hơ lih; tơ drong ưh jăh kĭ ăn trong tơ proh jang, trong iŏk yoa tĕh tơ̆ apŭng; tơ drong sek tơ lang jên ƀao hiêm y tê̆ đơ̆ng đe pơ jăng kuă kla, tơ lĕch, iŏk pơ dreu; tơ drong y ƀak si pơm hla ar apinh năm jang tơ̆ nai mă ưh ‘nŏh pơ dơ̆h jang...

Dơ̆ng: Tơ blơ̆