Jơ pơdơ̆h ngôi, anih mong đak hla ar Hnam trưng THCS Y Ngông Niê Kđăm, xăh Quảng Phú, dêh char Đắk Lắk roi chơt hơiă. Lơ̆m hnam kơjung đei pơm nhen thoi hnam bơngai Rađe, vă chep vei tơdrong juăt hai, pơm ăn mong, đŏk ghla ar ‘lơ̆ng hơiă hăm lơ kơsơ̆p hla ar, kơmăy tĭnh đei chô̆ internet, lơ hŏk tro truh đŏk hla ar, pơih lăng mang, hŏk grŭp dăh mă pơdơ̆h ngôi đơ̆ng rŏng kơ jơ hŏk.

Oh H’Julia Knul, hŏk tro lăm 8A, tơroi: “Oh tôch hơiă anih mong đŏk hla ar âu yoa sư nhen thoi hnam nhôn, đei lơ hla ar tơroi tôch hơiă vă chă đŏk ngôi, hŏk pơhrăm. Ƀât jơ pơdơ̆h ngôi păng dôm môn ưh đei hŏk ‘nŏh inh tŏk ngôi tơ̆ au. Chă pơih lăng, đŏk ngôi lơ hla ar tôch đei yoa ăn tơdrong hŏk pơhrăm păng pơhơi jơhngâm”.

Anih mong đŏk hla ar pơm thoi hnam kơjung âu đei et hơtŏk đơ̆ng sơnăm 2020, yoa Đoàn Grŭp anih tĕch mơdro kơ Trung ương tơgŭm jên pơm. Kŭm hăm ‘nŏh, anih jang đei 4 păh hnam hŏk hăm 30 lăm, 1 hnam pơtâp pơhrăm, 1 hnam ăn thây kô vei lăng bơ̆ jang, cham pơm ngôi, anih pơtâp… hlôi pơm ăn ‘lơ̆ng tơdrong pơtho păng hŏk ăn hlŏh 1.100 ‘nu hŏk tro.

Ƀok Nguyễn Long Điện, Hiê̆u trơng hnam trưng ăn tơbăt, lơ̆m dôm sơnăm âu ki Hnam trưng THCS Y Ngông Niê Kđăm iŏk đei lơ jên tơgŭm vă hơmet pơ ‘lơ̆ng rim tơdrong tơ̆ hnam trưng. Hăm 70% hŏk tro jĭ bơngai Rađe, rim tơdrong tơgŭm ăn hnam trưng ưh lăp tơgŭm pơm hơtŏk tơdrong ‘lơ̆ng ăn pơtho hŏk đĕch mă oei pơm tơjur ƀiơ̆ tơdrong ưh hơtŏ băl đơ̆ng tơring hiôk hian hăm tơring pơmat tat hai: “Anih mong jên Agribank đei jên tơgŭm lơ hlŏh pơting hăm dôm anih mong jên nai vang tơgŭm ăn hnam trưng. Jên tơgŭm âu hlôi man đei 2 anih gĭt kăl ăn hnam trưng, pơyoa ăn tơdrong pơtho hŏk pơhrăm”.

Ưh lăp vang yak hơdoi găh pơtho pơhrăm đĕch, dôm anih tĕch mơdro oei vang tơgŭm kŭm hăm tơring sut pơđĭ hnam pơgia, tơgŭm ăn kon pơlei tơ̆ tơring pơmat tat đei hnam oei sơđơ̆ng ‘lơ̆ng. Yă H’Bliắk Niê tơ̆ plei Ea Dhô, xăh Cư Pơng, čhôk ‘nă mưh tŏk oei tơ̆ hnam ‘nao xă vă jê̆ 100 m2. Vă đĭ jơhnơr arih xa lơ̆m hnam so hiăh hiok, yă ưh đei lai yơ tơchĕng truh tơdrong gơ̆h tŏk oei lơ̆m hnam man kơjăp ‘lơ̆ng thoi âu: “Inh čhôk ‘nă dêh mưh đei tŏk oei tơ̆ hnam ‘nao, hơiă tơpă nơh, rim năr hơnơ̆ng sut hơmet hnam ‘you rơgoh. Dang ei đei anih oei ‘lơ̆ng bơih, đei kơ kuat bơih, tivi kŭm đei hơpăh ăn, inh čhôk ‘nă dêh”.

Yă H’Bliắk jĭ 1 lơ̆m kơsô̆ 66 unh hnam kon pơlei tơ̆ xăh Cư Pơng đei tơgŭm man hnam kơjăp 'lơ̆ng lơ̆m tơdrong jang sut pơđĭ hnam hiăh hiok đơ̆ng Khul kơdră teh đak. Ƀok Y Blưn Mlô, sơ̆ pơm Phŏ Kơdră vei lăng kon pơlei xăh Cư Pơng so, Bí thư chi ƀô̆ plei Ea Dhô ăn tơbăt, kŭm hăm jên đơ̆ng teh đak, dôm anih tĕch mơdro vang tơgop jơhngâm, vang tơgŭm ăn tơring jang đang hrôih dôm tơdrong đei tơlĕch, pơjing anih gơnang yoa sơđơ̆ng 'lơ̆ng ăn kon pơlei oei xa: “Mưh đei tơgŭm ăn hnam đơ̆ng kơsô̆ jên Anih mong jên choh jang xa ‘nŏh kon pơlei ưh đei pơngơ̆t kiơ. Dang ei đe sư lăp pôm akŏm jơhngâm ăn tơdrong choh jang xa đĕch, đe tôch lăp đon”.

Bơ̆ jang tơdrong tơgŭm tơjur tơnuh hin păng vei sơđơ̆ng tơdrong arih xa tơpôl, lơ̆m 5 sơnăm âu ki, dêh char Đắk Lắk hlôi tơgŭm man păng hơmet ming rơbâu tŏ hnam ăn bơngai tơnuh păng vă jê̆ tơnuh; tơgŭm jên hŏk, phe, jên sŏng xa, jên anih tep ăn hlŏh 72.000 ‘nu hŏk tro, sinh viên găh unh hnam pơmat tat. Dêh char oei ƀơk vă jê̆ 3,3 triu tŏ the ƀao hiêm pơgang păng pơm hla ar ăn hlŏh 148.000 unh hnam tŏk iŏk hăm kơsô̆ jên hlŏh 5.900 ti.

Hăm dai hăm jên tơgŭm đơ̆ng teh đak, dôm khul grŭp, anih tĕch mơdro păng lơ bơngai vang tơgop truh dôm jĭt ti hlak jên ăn dôm tơdrong jang vei sơđơ̆ng arih xa tơpôl, đơ̆ng tơgŭm ăn oei, jên hŏk ƀŏng, vei lăng bơngai ưh pŭn ai, truh man gơng, man hnam hŏk tơ̆ tơring pơmat tat. Dôm tơdrong jang ‘nâu vang tơgop pơm hơtŏk đon tơgŭm băl, vang tơgŭm ăn dôm bơngai pơmat tat, ưh pŭn ai, pơlung đe sư jang tŏk.

Ƀok Lê Văn Thịnh, Kơdră vei lăng Agribank tơ̆ Đắk Lắk tơroi: “Lơ̆m dôm sơnăm âu ki anih mong jên tơlĕch lơ tơdrong jang tơgŭm vei lăng sơđơ̆ng tơdrong arih xa tơpôl truh hăm lơ bơngai, đơ̆ng chă tơgŭm ăn đe oh hŏk tro, hnam trưng, anih pơtho pơhrăm; tơgŭm sut pơđĭ hnam hiăh hiok kiơ̆ trong jang đơ̆ng Khul kơdră teh đak. Truh âu kơnh nhôn đei trong vă tơgŭm ăn dôm hnam hŏk so pơm hơmet ming păng sut pơđĭ 50 tŏ hnam hiăh hiok lơ̆m dêh char”.

Ưh lăp vang tơgŭm tơmam đĕch, dôm tơdrong jang vang yak hơdai, vang tơgŭm vei sơđơ̆ng tơdrong arih xa tơpôl đơ̆ng dôm khul grŭp, anih jang, anih mong jên oei tơgop pơm hơtŏk đon jang tơnăp yoa tơpôl, tơƀôh hơdăh jơhngâm đon băt tơgŭm băl, tơƀôh hơdăh tơdrong juăt ‘lơ̆ng đơ̆ng hơdrĕch hơdrung bơ̆n, vă tơpôl vang jang tŏk hơdai, ưh đei hŭt hơchăng bu tơ̆ rŏng.