Lơ̆m lơ sơnăm âu ki, tơ̆ dêh char Gia Lai, hơdai hăm tơdrong kơchăng tơblăh păng jang tŏk mŭk drăm khul linh, dôm khul linh hlôi tơlĕch lơ trong krao hơvơn kon pơlei rơgei, vang tơgŭm băl mưh pơmat tat, tơgŭm ăn kon pơlei đei tơdrong jang xa sơđơ̆ng, vă hơtŏk tơdrong arih xa. Bơ̆ jang kiơ̆ trong jang “1 giĕng tơgŭm ăn 1 unh hnam”, đơ̆ng sơnăm 2023 truh dang ei, Ƀô đô̆i vei lăng tơring sơlam dêh char Gia Lai hlôi tơgŭm ăn 750 unh hnam tơnuh, vă jê̆ tơnuh păng unh hnam đei kŏng; mong akŏm đei hlŏh 810 triu, 1,7 tân phe, 47 tơmam jang xa kŭm hăm vă jê̆ 3.000 năr jang tơgŭm ăn kon pơlei pơm hơmet hnam oei.

Sơnăm 2024, trong jang đei Ban Tuyên giáo Trung ương pôk pơ ư jĭ 1 lơ̆m dôm trong “Krao hơvơn kon pơlei rơgei” ‘lơ̆ng hơiă lơ̆m teh đak. Đại tá Khuất Bá Cao, Bí thư Đảng, Phŏ ƀok Yŏng Binh đoàn 15, ăn tơbăt: hăm trong “tơgŭm tơdrong arih xa, tơ̆k hơdăh đon lui”, hơdrô̆ sơnăm 2024, Binh đoàn hlôi jang đang 23 tơdrong jang hăm vă jê̆ 45 km tơlei unh điên, 1.500 tŏ jrăng chô̆ kơƀŏng unh điên, akŏm đĭ đăng jên jang truh 4 ti; sơnăm 2025 vă tơlĕch jang dơ̆ng 13 tơdrong jang, đei kơjă hlŏh 3 ti hlak jên.