Thủ tướng Lê Minh Hưng kơtă nơ̆r apĭnh jet dôm tơdrong găh hơnăp jang đơ̆ng Khŭl kơdră teh đak. Dôm tơdrong găh 2 grŭp tơdrong apĭnh jet hlôi đei 1,2 bơngai tang măt Quốc hội bơngơ̆t truh, pơma tơ̆ ‘măng pơma dơnuh găh mŭk drăm - tơpôl ‘năr 30 păng 31/10, hlôi đei 19 ‘nu bơngai tang măt pơma dơnuh găh dôm tơdrong găh tơdrong jang jên hu, 11 ‘nu bơngai tang măt pơma dơnuh găh dôm tơdrong jang khoa hŏk păng kơmăy kơmŏk.

Kơdră Quốc hội Trần Thanh Mẫn akhan, apĭnh jet păng tơl nơ̆r apĭnh jet ‘noh jĭ trong dăr hơlen kơtă, tơƀôh hơdăh hơnăp jang đơ̆ng Quốc hội, Khŭl kơdră teh đak păng dôm anih jang kơpal tơ̆ hơnăp bơngai tăh hla, Kon pơlei hăm tơdrong bơ̆jang kiơ̆ dôm nơ̆r pơkăp, hơnăp jang đei pơjao păng dôm tơdrong tơplih đơ̆ng rŏng ‘măng apĭnh jet hơdrol ‘noh. ‘Măng apĭnh jet ‘măng âu hơnơ̆ng tơƀôh jơhngơ̆m đon Quốc hội vang yak hơdai hăm Khŭl kơdră teh đak, akŏm lơ̆m dôm tơdrong tơhlăk, tơƀôh rơđăh dôm tơdrong mơmat tat, tơhlăk tơhlĭn, vă tơtom hơmet pơ ‘lơ̆ng, hơvơn păng iŏk yua jơnei dôm kon jên jang, hơtŏk ‘lơ̆ng iŏk yua, ‘lơ̆ng jang tŏk, vei sơđơ̆ng mŭk drăm tih, hơtŏk tơiung hrĕnh, kơjăp păng hơtŏk ‘lơ̆ng tơdrong hơrih sa kơ Kon pơlei.