Pơgê năr 28/10 hlôi pơgơ̆r ‘Măng hop akŏm Dơnŏ anĭh bơ̆ jang hơdoi Khŭl kơdră Tĕh đak Việt Nam - Hàn Quốc ‘măng mă 19.

‘Măng hop akŏm Dơnŏ anĭh jang hơdoi Khŭl kơdră tĕh đak Việt Nam - Hàn Quốc ‘măng mă 19

Tơdrong tơm kơ ‘Măng hop akŏm mă au vă lăng hơlen tơdrong jang hơdoi ƀar tĕh đak lơ̆m rim tơdrong đơ̆ng ‘Măng hop akŏm mă 18 trŭh dang ei, adoi tơlĕch trong jang lơ̆m khei năr kơnh. Ƀar păh hlôi pơma dơnŭh găh dôm tơdrong păng rim trong atŏk kơtang jang hơdoi lơ̆m mơdro sa, tơmơ̆t jên jang, jang hơdoi atŏk tơ iung, bơngai jang-tơpôl, ŭnh hơyŭh, trong hnam, kon jên hu-hơnĭh mong jên ... păng mĭnh ƀar tơdrong anai. Tơgoăt tơgoăl Việt nam- Hàn Quốc hơnơ̆ng atŏk tơ iung kơtang lơ̆m sơnăm au ki tơ̆ rim tơdrong, hơnhăk đei iŏk yua kơ jăp, hlô̆h vao dĭh băl, lui dĭh băl kơtang kơ ƀar păh. Sơnăm au tơbăt hơdăh 30 sơnăm pơjing tơbôl păng jang hơdoi atŏk tơ iung Việt nam- Hàn quốc, hlôi iok đei jơnei tĭh tên lơ tơdrong. Jô̆ trŭh khei 9 sơnăm au, Hàn Quốc hlôi đei dang 9.438 tơdrong jang oei gơ̆h jang, hăm akop kon jên tơmơ̆t jang dang 80 ti 500 trĭu dolar, jing tĕh đak jang hơdoi tơm dơnơm hlŏh kơ Việt Nam găh tĕh đak đe tơmơ̆t jên jang.