VOV4.Bahnar - Kơsơ̆ năr 4/4, ‘Măng hop akŏm joăt joe khei 3 kơ Khŭl kơdră tĕh đak hơnơ̆ng bơ̆ jang hăm tơdrong jang tơ iung pơjing khôi luơ̆t. Khŭl kơdră tĕh đak hlôi mơ̆ng, pơma dơnŭh athei pơjing Khôi luơ̆t vei lăng, iŏk yua kon jên tĕh đak tơmơ̆t jang lơ̆m chŏh jang sa, tĕch mơdro tơ̆ hơnĭh mơdro sa (hơmet ming); athei tơ iung pơjing tơdrong vă jang Khôi luơ̆t atŏk tơ iung kmăi kmŏk; tơdrong vă pơjing Khôi luơ̆t Khăm jĭ, hơmet jĭ; hla bơar tơbăt găh tơchơ̆t hơgăt tĕh iŏk yua kiơ̆ khei ‘năr hăm rim hơnĭh jang kmăi kmŏk pơm tơlĕch tơmam drăm hăm hơgăt tĕh să hlŏh 500 ha lơ̆m trong vă pơjing Tơdrong tơchơ̆t găh vei lăng Hơnĭh jang kmăi kmŏk păng hơnĭh jang mŭk drăm. Kiơ̆ pơma dơnŭh găh tơdrong tơ iung pơjing khôi luơ̆t, rim kơdră jang lơ̆m Khŭl kơdră chĕp pơgơ̆r tĕh đak hlôi pơm hơdăh dơ̆ng tơdrong kăl đei rim tơdrong vă jang, athei tơ iung pơjing Khôi luơ̆t au; dôm trong tơhlăk tơhlĭn, tơdrong tim mă ‘lơ̆ng kăl xek tơlang; trŏ lăp, hrơ̆p lei lăi ƀar păh rim khôi luơ̆t ... ‘moi kiơ̆ pơjing khôi luơ̆t ư̆h khan vă vei lăng mă lei pơjing đei trong ‘lơ̆ng tơgŭm ăn atŏk tơ iung. Pơma pơtôch găh tơdrong tơ iung pơjing khôi luơ̆t, Thủ tướng tĕh đak drơ̆ng nơ̆r găh trong vă pơjing khôi luơ̆t păng tơgop nơ̆r pơma dơnŭh đơ̆ng Khŭl kơdră chĕp pơgơ̆r tĕh đak. Thủ tướng pơjao ăn rim Hơnĭh tơm, hơnĭh bơ̆ jang ƀơm trŭh pơm tơm, iung jang hơdoi tơgoăt iŏk, pơm pơkeh vă pơtrŭh ăn Kuô̆k hô̆i lăng hơlen.

Tơblơ̆ nơ̆r: Amazưt