VOV4.Bahnar - Pơ gê ‘năr 11/5, tơ̆ Hnam Kuôk hô̆i, pơ gơ̆r ‘măng hop akŏm mă 11 kơ Anih chĕp kơ̆l pơ gơ̆r Kuôk hô̆i. Tơ̆ ‘măng hop akŏm âu, Anih chĕp kơ̆l pơ gơ̆r Kuôk hô̆i ăn tơ gop nơ̆r hăm 11 tơ drong tơm. Lơ̆m noh kăl kơ lăng truh ‘noh jĭ tơ roi tơ băt găh mŭk drăm - tơ pôl păng jên jang teh đak sơ năm 2021 păng tơ drong bơ̆ jang kiơ̆ dôm khei blŭng sơ năm 2022. Mă kăl ‘noh, tơ̆ ‘măng hop akŏm âu, Anih chĕp kơ̆l pơ gơ̆r Kuôk hô̆i ăn tơ gop nơ̆r găh tơ drong pơ truh ăn Kuôk hô̆i set hơ len, tơ chơ̆t trong jang tơ mơ̆t jên jang Tơ drong jang pơm trong ver 4 tơ ring Anih tơm Hà Nội, Tơ drong jang pơm trong ver 3 pơ lei tơm Hồ Chí Minh; Tơ drong jang ming man trong gre kơ dâu hrĕnh Châu Đốc – Cần Thơ - Sóc Trăng; Tơ drong jang Khánh Hòa - Buôn Ma Thuột; păng tơ drong jang Biên Hòa - Vũng Tàu. ‘Nâu jĭ dôm tơ drong jang gĭt kăl kơ teh đak găh gơh kĭ ăn đơ̆ng Kuôk hô̆i tơ chơ̆t trong jang tơ mơ̆t jên jang, đei iŏk yua lơ jên jang trung ương, tơ ring, jên tơ mơ̆t jên jang teh đak păh lăp khei ‘năr păng jên găh pơ trŭt mŭk drăm.

Thuem: Tơ blơ̆