Tơ̆ ‘măng hop akŏm, Jơnŭm pơgơ̆r kon pơlei dêh char Gia Lai hlôi set hơlen, tơchơ̆t klăih song jên tơmơ̆t jang păh lăp khei ‘năr sơnăm 2026-2030; hơmet ming trong tơlĕch jang tơmơ̆t jên jang teh đak sơnăm 2026; trong jang tơgŭm hơtŏk tơiung choh jang sa, tơring tơrang, khoa hŏk kơmăy kơmŏk, hnam oei tơpôl, hơtŏk tơiung bơngai jang păng vei sơđơ̆ng tơdrong hơrih sa tơpôl.

Kăl kơ lăng truh, Jơnŭm pơgơ̆r kon pơlei dêh char Gia Lai pơdrơ̆ng kiơ̆ tơdrong tơchơ̆t tơmơ̆t dơ̆ng hloh 4.700 ti đơ̆ng jên hơtŏk iŏk yua păng jên tơplih kơ sơnăm 2026, hơtŏk akŏm trong tơlĕch jên tơmơ̆t jang teh đak sơnăm 2026 tŏk vă jê̆ 18.000 ti hlak jên. Pơma pơtôch ‘măng hop akŏm, Kơdră Jơnŭm pơgơ̆r kon pơlei dêh char Gia Lai  Rah Lan Chung athei Anih vei lăng kon pơlei dêh char Gia Lai kŭm hăm rim anih jang, tơring tơtĕnh tơlĕch jang đei yua dôm tơdrong tơchơ̆t ‘nao đei pơdrơ̆ng kiơ̆, jăh tơmơ̆t tơdrong tơchơ̆t lơ̆m tơdrong hơrih sa, pơm tơdrong ‘lơ̆ng hơtŏk tơiung hrĕnh păng kơjăp ăn Gia Lai.