Năr ‘nâu (24/10), ‘Măng hop akŏm mă 4, Kuôk hô̆i jăl 15 mât lơ̆m giĕng bơ̆ jang mă 2. Lơ̆m giĕng bơ̆ jang âu, Kuôk hô̆i pơ ma dơ nuh lơ tơ drong gĭt kăl. Kăl kơ lăng truh, Kuôk hô̆i ‘măn 2 năr pơ ma dơ nuh tơ̆ hơ nih hop akŏm tơm găh: Pơ tôch jang kiơ̆ trong tơ lĕch jang hơ tŏk tơ iung mŭk drăm - tơ pôl sơ năm 2022; tơ chĕng hơ drol tơ lĕch jang hơ tŏk tơ iung mŭk drăm - tơ pôl sơ năm 2023; Tơ drong jang kiơ̆ jên jang teh đak sơ năm 2022, jên vă jang kơ teh đak, trong tơ lĕch jang tơ mơ̆t jên jang teh đak, trong jang klăih song jên jang trung ương sơ năm 2023.

Kuôk hô̆i pơ ma dơ nuh kơ tă găh tơ drong mŭk drăm - tơ pôl păng jên jang teh đak

Dôm ‘măng hop akŏm âu đei pơih pơ re - pơ dăh ti vi kơ tă vă bơ ngai tăh hla păng Kon pơ lei đei răp hơ len. Găh pơ jing Luơ̆t, kăl kơ lăng truh, Kuôk hô̆i pơ ma dơ nuh tơ̆ anih hop akŏm tơm găh 1,2 tơ drong oei tơ gop nơ̆r pha ra băl  đơ̆ng dôm Luơ̆t ‘noh: Khăm jĭ, hơ met jĭ ( hơ met ming); dăr hơ len (hơ met ming); Đak dâu ( hơ met ming); Tang măt, tơ jră teh dong băl lơ̆m unh hnam ( hơ met ming).