Kơdră chĕp pơgơ̆r Kuô̆k hô̆i Trần Thanh Mẫn tơbăt, tơ̆ hop akom ou, Hơnih chĕp pơgơ̆r Kuô̆k hô̆i gô ăn tơgop nơ̆r hăm 10 tơdrong vă pơjing khôi luơ̆t păng 1 tơdrong vă pơjing Tơdrong tơchơ̆t tơchĕng lăng gô pơdrơ̆ng tơ̆ ‘Măng hop akŏm mă Blŭng. Tơdrong tơchơ̆t tih tên, hơmet ming lơ, lơ tơdrong oei đei nơ̆r tơgop phara dih băl; athei rim kơdră jang lơ̆m Hơnih bơ̆ jang chĕp pơgơ̆r Kuôk hô̆i, rim hơnih tơm, hơnih bơ̆ jang akŏm pơm hơdăh dôm tơdrong oei tơhlăk tơhlĭn, dôm trong jang oei tim mă hơdăh, dôm tơdrong kăl apĭnh nơ̆r tơgop, pơrô̆ jang vă drơ̆ng mĭnh nơ̆r hơdrol kơ pơtruh ăn Kuô̆k hô̆i. Pơma hơdăh lăp pă 13 năr dơ̆ng ‘noh truh năr pơgơ̆r pôk rơih, Kơdră chĕp pơgơ̆r Kuô̆k hô̆i pơma tơbăt dơ̆ng nơ̆r pơrô̆ iung jang đơ̆ng Tổng bí thư Tô Lâm, tơdrong jang tơm lơ̆m khei 3 ou ‘noh kăl pơgơ̆r ‘măng pôk rơih kơdră tang măt Kuô̆k hô̆i păng kơdră tang măt Jơnŭm vei lăng kon pơlei rim kâp păng hơmet ăn ‘măng hop akom mă blŭng, Kuô̆k hô̆i jăl XVI, ‘Măng hop akŏm mă blŭng kơ Jơnŭm chĕp pơgơ̆r Kon pơlei rim tơring jơnei ‘lơ̆ng liĕm.