VOV4.Bahnar - Pơgê au, năr 10/3, tơ̆ Hnam Kuô̆k hô̆i, pơgơ̆r blŭng a Hop akŏm mă 9 kơ Dơnŏ anĭh chĕp pơgơ̆r Kuô̆k hô̆i. ‘Măng hop akŏm au tơklăh pơm 2 ‘măng, hăm jơ ‘năr hop akŏm ‘nŏh 8 năr. ‘Măng mă blŭng hop akŏm đei pơgơ̆r đơ̆ng năr au trŭh năr 17/3. Mă kăl, ‘măng hop akŏm au, Dơnŏ anĭh chĕp pơgơ̆r Kuô̆k hô̆i ‘măn 1 năr vă pơgơ̆r apĭnh păng tơl nơ̆r apĭnh đơ̆ng kơdră tang măt Kuôk hô̆i hăm 2 ‘nu Kơdră chĕp pơgơ̆r Tĕh đak. Kơdră chĕp pơgơ̆r Dơnŏ anĭh tơm vei lăng Mơdro sa Nguyễn Hồng Diên hăm Kơdră chĕp pơgơ̆r  Dơnŏ anĭh tơm vei lăng Mŭk drăm Bri brăh păng Cham char Trần Hồng Hà gô tơl hơdăh nơ̆r apĭnh đơ̆ng Dơnŏ anĭh chĕp pơgơ̆r Kuôk hô̆i jăl XV. Dôm tơdrong apĭnh Kơdră chĕp pơgơ̆r Dơnŏ anĭh tơm vei lăng Mơdro sa Nguyễn Hồng Diên găh tơdrong pơm tơlĕch, tĕch mơdro đak xăng đak dau; bơ̆ jang vei lăng kơ jă đak xăng đak dau lơ̆m khei năr au ki. Dôm tơdrong apĭnh hăm Kơdră chĕp pơgơ̆r Dơno anĭh tơm vei lăng Mŭk drăm Bri brăh păng Cham char Trần Hồng Hà akŏm lơ̆m tơdrong jang kiơ̆ tơchơ̆t găh apĭnh hơlen păng tơdrong jang dăr lăng đơ̆ng Kuôk hô̆i đei ƀơm trŭh pơ prŏ, vei lăng, iŏk yua groi tĕh tơ̆ tơring kơdrơ̆m. ‘Măng apinh hơlen đei pơgơ̆r lơ̆m năr 16/3, tơ̆ Hnam hop akŏm Diên Hồng, Hnam Kuô̆k hô̆i păng đei pơdăh kơtă lơ̆m tivi hăm 63 Khŭl kơdră tang măt Kuô̆k hô̆i tơ̆ rim dêh char, pơlei tơm găh Trung ương păng đei pơdăh kơtă vă bơngai tăh hla păng kon pơlei chă mơ̆ng, lăng.

Tơblơ̆ nơ̆r: Amazưt