VOV4.Bahnar - Pơ gê ‘năr 14/7, tơ̆ Anih bơ̆ jang kơ Khŭl kơ dră teh đak, Thủ tướng teh đak Phạm Minh Chính pơ gơ̆r ‘măng hop akŏm ‘măng mă 3 Anih pơ gơ̆r jang teh đak tơ lĕch jang kiơ̆ nơ̆r pơ kăp đơ̆ng Việt Nam tơ̆ Hop akŏm COP 26. Pơ ma tơ̆ ‘măng hop akŏm, Thủ tướng Phạm Minh Chính athei Anih pơ gơ̆r jang bơ̆ jang kiơ̆ ‘lơ̆ng dôm hơ năp jang hlôi tơ lĕch ăn, hơ met pơ ‘lơ̆ng dôm mơ mat tat, dôm trong jang tơ gŭm khôi luơ̆t pơm tơ drong hiôk bơ̆ jang kiơ̆ dôm nơ̆r pơ kăp đơ̆ng Việt Nam tơ̆ COP26.

Thủ tướng kŭm athei dôm bơ ngai tang măt pơ ma dơ nuh akŏm tơ drong tơm, gĭt kăl ‘noh tơ lĕch trong jang, rim anih tơm, anih jang kiơ̆ lơ̆m tơ drong jang, gơh jang pơ gơ̆r bơ̆ jang kiơ̆. Rim tơ ring kŭm hlôi hlôh vao păng pơ gơ̆r tơ lĕch jang, vei kơ jăp dôm nơ̆r pơ kăp tơ̆ Hop akŏm COP26, mă loi ‘noh găh tơ drong hơ găt tơ jur tôch ai găn ưh kơ đei tơ lĕch đak ‘mê̆ ‘mach lơ̆m sơ năm 2050 ‘moi kiơ̆ bơ̆ jang kiơ̆ dôm hla ar pơ kăp khôi luơ̆t, dôm hla ar pơ tho đơ̆ng anih jang trung ương.

Thuem: Tơ blơ̆